काठमाडौँ, ५ चैत ।  तोकिएभन्दा बढी भार बोक्ने सवारीसाधनलाई कारबाही गरिने भएको छ । सडक संरचनाको संरक्षण तथा यातायात व्यवस्थापनमा पर्ने असर न्यूनीकरण गर्ने उद्देश्यसहित यस्तो कदम चाल्न लागिएको हो । यातायात व्यवस्था विभागले तोकिएभन्दा बढी भार बोक्ने सवारी साधनलाई थप कारबाहीको दायरामा ल्याइने जनाएको छ ।

चैत १५ देखि सवारीसाधनले तोकिएभन्दा बढी भार बोकी सञ्चालन गरेको पाइए सम्बन्धित स्थानमै सवारीसाधनबाट सामग्री झारिने र यसबाट पर्ने नोक्सानीको जिम्मेवार सम्बन्धित व्यवसायी नै हुने यातायात व्यवस्था विभागका निर्देशक तथा प्रवक्ता डा. लोकनाथ भुसालले जानकारी दिए ।  उनका अनुसार सवारीसाधनले लोड हुने ठाउँबाट नै ‘लोडसिट’ लिएर हिँड्नुपर्नेछ । ‘लोडसिट’ नभएको जुनसुकै अवस्थामा पनि तोकिएभन्दा बढी भार बोक्ने सवारीसाधन कारबाहीको दायरामा आउन सक्छन् । अब चालकले अनिवार्य रूपमा सवारीसाधनको ‘लोडसिट’ लिएर मात्र यात्रा गर्नुपर्नेछ ।

यसअघि तोकिएभन्दा बढी भार बोक्ने सवारीसाधनलाई जरिवाना गर्ने व्यवस्था गरिएकोमा चैत १५ बाट बढी भएको सामग्री सवारीसाधनबाट ठाउँको ठाउँ झारिने गरी कामकारबाही गर्न मुलुकभरि ट्राफिक प्रहरीलाई विभागबाट परिपत्र भइसकेको प्रवक्ता भुसालले बताए । सवारीसाधनको भारवहन नियमनसम्बन्धी निर्देशिका, २०७४ निर्माण भए पनि अहिलेसम्म त्यसको प्रभावकारी कार्यान्वयन हुन सकेको छैन ।