इनरुवा, ५ वैशाख । सुनसरी सदरमुकाम समेत रहेको इनरुवा नगरपालिका क्षेत्रमा कोरोना भाईरस कोभिड १९ को जोखिमलाई मध्यनजर गरी विद्यालयहरु बन्द गरिएको छ । नगर क्षेत्रभित्रको एक विद्यालयका विद्यार्थीमा नयाँ प्रजातिको कोरोना देखिएपछि विद्यालय अनिश्चितकालका लागि बन्द गरिएको हो ।

इनरुवा नगरपालिका कार्यालयले आइतबार सूचना जारी गरी नगरभित्रका विद्यालयहरु अर्को सूचना जारी नभएसम्मको लागि बन्द गर्ने गरिएको हो । नगरपालिकाको कार्यालयले सूचना जारी गर्दै विद्यालय बन्द गरिएको नगरप्रमुख राजन मेहताले बताए ।

मेहताले नगरभित्र रहेको विद्यालयमा अध्ययनरत विद्यार्थीमा कोरोना देखापरेको र समुदायमा समेत संक्रमण फैलन सक्ने अवस्थालाई मध्यनजर गर्दै बन्दको निर्णय गरिएको जानकारी दिए ।

यसैबीच, विद्यालय बन्द गर्ने निर्णय गरेको नगरपालिकाले नगर भित्र भिडभाड हुने कुनै पनि गतिविधि गर्न नपाइने भनेको छ । जारी सूचना अनुसार मेला, भेला, सभा, सम्मेलन जस्ता कार्य गर्न रोक लगाइएको छ । सुनसरी प्रशासनले भने जिल्लाभर लागू हुने गरी भिडभाड हुने कार्यमा रोक लगाइएको विषयको सूचना यस अघिनै प्रकाशित गरिसकेको छ । यहाँ सूचना र निर्णयको कार्यान्वयन भने फितलो रहेको छ । आइतबार सूचनाको बेवास्ता गर्दै निजी विद्यालयहरु निर्वाद रुपमा खुलेको छ ।