विराटनगर, ५ वैशाख । हास्य–व्यङ्ग्य गायक श्रीकृष्ण लुइँटेल ‘बोकेदाह्री’ले नयाँ गीत बजारमा ल्याएका छन् । आइतबार उनले ‘आज बिहेमा आको छु’ बोलको गीत युटुबमा सार्वजनिक गरेका हुन् ।

श्रीकृष्णको आधिकारिक युटुब च्यानलमार्फत उक्त गीत भने फरक जनरामा छ । प्रायः कमेडी धारको गीतमार्फत गहन विषय उल्लेख गर्नेगरेका बोकेदाह्रीले यस गीतमा भने एउटा बिहेको माहोला सिर्जना गर्न खोजेका छन् ।

श्रीकृष्णकै स्वर रहेको सो गीतमा उनलाई गायिका कविता सिवाकोटीले गायनमा साथ दिएकी छन् । उनकै संगीतमा बनेकाे उक्त गीत जोनी योञ्जनले एरेन्ज गरेका हुन् ।

कृष्ण सुवेदीको छायांकनमा बनेकाे सो गीतको भिडियोमा गायक बाेकेदाह्रीका साथै सुबोध रसाइली, सोनिया कटुवाल, भवेश थापा, मात्रिका पोखरेललगायतको अभिनय छ । रोहित लाम्गाडेको कोरियोग्राफी तथा निर्देशन रहेको उक्त भिडियो बिहेको माहोलका बीच सकिन्छ ।

प्रायः कमेडी गीतमार्फत गहन सन्देश दिन प्रयासरत श्रीकृष्णले यो गीत फरक प्रयास भएको उल्लेख गरेका छन् । ‘कमेडी बिधामा धेरै गीत गरेँ, केही फरक गर्ने प्रयासमा यो गीत सिर्जना गरेको हुँ । सुनेर प्रतिक्रिया दिनुहुन्छ भन्ने अपेक्षा छ’, उनले राष्ट्रिय डेलीसँग सुनाए ।