विराटनगर, ६ वैशाख । इटहरी तरहराका विनय सरगम मोफसलमा बसेर कविता लेखनमा सक्रिय छन् । ‘अनुहारको भिड’ संयुक्त कविता संग्रहमार्फत आफ्ना सशक्त कविता प्रस्तुत गरेका सरगमले पूर्वेली गजल संग्रहसमेत सम्पादन गरिसकेका छन् ।

छोटो समयमै आफ्ना सशक्त कवितामार्फत युवाहरूमाझमा परिचित सरगम क्यानभास साहित्य समाजका संस्थापक अध्यक्ष पनि हुन् । उनीद्वारा लिखित अनुहारको भिडमा पाँच सशक्त कविताहरू समावेश छन् ।

विभिन्न साहित्यिक कार्यक्रमहरूमा आफ्ना गहकिला कविता प्रस्तुत गरी पाठक तथा स्रोताको मन जित्न सफल तिनै विनय सरगमका तीन कविता साताको साहित्यमा प्रस्तुत गरेका छौँ ।

आँसुको वर्णमाला

एक दिन अचानक
उनका आँखाबाट आँशु झर्‍यो

त्यो तिनै आँखा थियो-
जो हरबखत मुस्काइरहन्थ्यो
जो जिस्किरहन्थ्यो आफ्नै ढुकढुकीसँग
जो बदला लिइरहन्थ्यो आफैँले फेरेको साससँग

त्यो तिनै आँखा थियो
जो बाटो थियो एउटा दृस्टिकोणको
र कहिलेकाहीँ दौडिन्थ्यो अहङ्कारको घोडा

त्यो तिनै आँखा थियो
बैशालु रङ्गहरूमा लपक्कै भिजेको
नशालु सपनाहरूमा चम्किरहेको
रहरहरूमा झुलिरहेको

हो, त्यो तिनै आँखा थियो
जहाँ असफताहरूको केही शृङ्खला थिए
जहाँ वर्षाैँदेखि जमेका केही
दु:खका बुँदाहरू थिए

एक दिन अचानक
उनका आँखाबाट आँसु झर्‍यो
आशाको उज्यालो हरायो कि ? छोपिदियो निराशाले ?
आत्महत्या गरिदियो कि ? जिउन चाहने जिजीविषाले !
दुर्घटिट पो भइदियो कि ?आफ्नै आँखाभित्र खुसीहरू ?

एक दिन अचानक
उनकाे आँखाबाट आँसु झर्‍यो !
खासमा, त्यो आँसु नै उनकाे जिन्दगी थियो !

चुहिजाने जून

इनारमा डुबिरहेको जूनलाई
उघाएँ र भरेँ हत्केलाभरि

खसिजान सक्थ्यो-
सम्हालेर राखेँ
औँलाहरू बाँधेर राखेँ
इनारमा डुबिरहेको जुनलाई
हत्केलाभरि भरेँ

जून विस्तारै-विस्तारै
हत्केलाबाट चुहिन थाल्यो

खाली हात हेर्दा पो झस्किएँ,
त्यो चुहिसकेको “जून” त
मेरो जिन्दगी थिएछ ।

मेरा दिनहरू –

सहरको कुनै एक अप्रचलित क्याफेको
एक कुनामा बसेर कफी पि’रहेछु

यहाँ बाट म सुन्न सक्छु
हतारमा कुदिरहेको यात्रुवाहक बसको ध्वनी
जाममा फसेको कुनै मोटरसाइकलको हर्न
कुकुरहरूको कर्कस लाग्ने भुकाइ

यहाँबाट म देख्न सक्छु
घरको छतमा हल्लिरहेको झण्डा
साइकलमा सामान बेचिरहेको ब्यापारी
सायद अफिस हिँडिरहेको हतार मान्छे
र यो पनि देखिरहेछु कि
वर्षौंअघि छुटिगएको
तिमी जस्तै लाग्ने प्रतिविम्ब

अस्तब्यस्त छन्
यहाँबाट सुनिने आवाजहरू
यहाँबाट देखिने दृश्यहरू
यहाँबाट देखिने सहर

र आजकल
यो मन पनि सहर जस्तो भएको छ ।