काठमाण्डौं, ३ जेठ । नेपाल पत्रकार महासङ्घले कोरोना महामारीको समयमा पत्रकारलाई कामबाट ननिकाल्न निजी सञ्चार गृहहरूलाई चेतावनी दिएको छ । कोरोना महामारीको दोस्रो लहरमा पनि निजी सञ्चार गृहहरूले श्रमजीवी पत्रकारलाई निकाल्न थालिएको सूचना आएको भन्दै महासङ्घले कुनै पनि बहानामा पत्रकारको रोजगारी नखोस्न चेतावनी दिएको हो ।

नेपाल पत्रकार महासङ्घका महासचिव रोशन पुरीले कोरोना महामारीका बेला कुनै पनि बहानामा पत्रकारलाई निष्कासन नगर्न आग्रह गरे । उनले कोभिड १९ को पहिलो लहरमा जस्तै दोस्रो लहरमा पनि पत्रकारलाई निष्कासन गर्न सुरु गरिएको र निष्कासित भएका पत्रकारका निम्ति महासङ्घले कानुनी लडाइँ लड्नुको साथै दबाबमूलक काम गरिरहेको बताए । महासङ्घले कोभिडको दोस्रो लहरमा निष्कासनमा परेका नौ जनाको पुनर्नियुक्तिसमेत गराएको महासचिव पुरीले जानकारी दिए । त्यसैगरी पाँच सञ्चार माध्यमलाई सात दिनभित्र पत्रकारको समस्या समाधान गर्न अल्टिमेटम दिएको पनि उनले जानकारी दिए ।

पुरीले ऐन बनाउने र कार्यान्वयन नगर्ने विडम्बनाबाट सरकार माथि उठ्नुपर्ने आवश्यकता रहेको बताए । महासङ्घले महामारीको समयमा पत्रकार फ्रन्टलाइनमा बसेर काम गरिरहेको भन्दै फ्रन्टलाइनरको परिभाषाभित्र पत्रकारलाई पनि समेटेर त्यही प्रकारको सेवा, सुविधा र व्यवहार गर्न पनि सरकारसँग आग्रह गरेको छ ।
पत्रकार महासङ्घले कोरोना सङ्क्रमित पत्रकारलाई उपचारका लागि सहजीकरण पनि गरिरहेको छ । पत्रकार महासङ्घको केन्द्रीय कार्यालयमा रहेको आवास गृहमा आइसोलेशन बेड निर्माण गरेको गरिएको छ ।

त्यसैगरी दाङ, रोल्पा, कपिलवस्तु, पाल्पा, गुल्मी, अर्घाखाँची, प्युठान, बाग्लुङ, पर्वत लगायतका जिल्लामा अक्सिजन, चिकित्सकसहितको आइसोलेशन सेन्टर बनाएर उपचार गर्ने वातावरण बनाएको महासचिव पुरीले जानकारी दिए । काठमाण्डौं उपत्यकामा सङ्क्रमित पत्रकारका लागि बेड, अक्सिजन, औषधि खोज्ने र बाहिरी जिल्लाबाट रिफर भइ आएका पत्रकारलाई काठमाण्डौमा बेड मिलाउने, आईसीयू, भेन्टिलेटर मिलाउने जस्ता काम महासङ्घले गरिरहेको उनले जानकारी दिए ।

महासङ्घका अनुसार, जेठ २ गतेसम्म देशभर गरी झन्डै आठ सय जना पत्रकार कोरोना सङ्क्रमित भएका छन् । अहिले दुई सय ५० भन्दा बढी सक्रिय सङ्क्रमित छन् । ४० जनाको अस्पतालमा उपचार भइरहेको छ । ६ जनाको आईसीयू र भेन्टिलेटरमा उपचार भइरहेको छ भने सङ्क्रमणबाट १३ जना पत्रकारले ज्यान गुमाएका छन् ।