विराटनगर । सुन्दरहरैँचा नगरपालिकाका प्रमुख शिवप्रसाद ढकालले सङ्घीय सरकारले स्थानीय सरकारलाई कोरोना सङ्क्रमणको महामारीको बेलामा सोधखोज नै नगरेको भन्दै आक्रोश पोखेका छन् । मंगलबार सामाजिक सञ्जालमा मेयर ढकालले महामारीको समयमा प्रदेश सरकारले सहयोग नगरेको भन्दै प्रदेश सरकार हरियाणातिर छ कि हनिमुनमा भन्दै प्रश्नसमेत गरेका छन् ।

यस्तै उनी कोरोना महामारीबाट आक्रान्त भएको बेला सङ्घीय सरकारबाट केही स्वास्थ्य सामग्री प्राप्त हुने खबर पाएपछि खुसी भएका थिए । तर सङ्घीय सरकारबाट सामान पाएपछि भने आश्चर्यसमेत व्यक्त गरेका छन् । सङ्घीय सरकारले सुन्दरहरैँचा नगरपालिकालाई कोरोना महामारी नियन्त्रणको लागि भनेर पठाएको सामग्री देखेर उनी आश्चर्यमा परेका हुन् ।

कोरोना सङ्क्रमणका लागि लड्न भनेर सङ्घीय सरकारले सुन्दरहरैँचा नगरपालिकालाई १ थान पल्समिटर, २ थान थर्मल गन, १० थान पिपिई सेट, ५० थान एन ९५ मास्क र ५० थान सर्जिकल मास्क पठाएको छ । यो सामग्रीको विवरण हेर्दै उनले आफ्नो आक्रोश सामाजिक सञ्जालमा पोखेका छन् ।

उनले लेखेका छन्, ‘धन्य, सङ्घीय सरकार, २ लाख जनसङ्ख्या भएको सुन्दरहरैँचा नगरपालिकालाई कोरोना महामारी नियन्त्रण र रोकथामका लागि आज पठाएको सामान प्राप्त भयो । सरकारबाट जनताको सुरक्षा लागि प्राप्त यो सहयोग आजसम्मकै उच्च हो ।’

‘लाजसरम भन्ने शब्द हुँदोरहेनछ, अझै प्रदेश सरकार त हरियाणा इन्डियातिर छ कि हनिमुन मा ? यत्रो विपदमा आजसम्म एक शब्द सोध्ने त के, केही बुझौँ न भनो फोनसम्म उठाउँदैनन् । केन्द्रीय सरकारबाट प्राप्त सामानको विवरण, पल्स अक्सोमिटर- एक थान, थर्मल गन – २ थान, पिपिई सेट – १० थान, एन९५ माक्स – ५० थान, सर्जिकल माक्स – ५०० थान, भाषण र तिकडमले कोरोना भगाउने गरिको योजना जो बनेको छ, साह्रै भाग्यमानी हामी नेपाली ।’