विराटनगर, १४ जेठ । विराटनगरको सिटी सिनेमा हलमा उद्योगीहरूलाई सुटुक्क कोरोना भाइरसविरुद्धको खोप लगाइएको भन्दै स्थानीय आक्रोशित बनेका छन् । कोरोना महामारीविरुद्ध अग्रमोर्चामा खटिएकाले दोस्रो डोजको खोप नपाइरहेको अवस्थामा नेकपा एमाले पार्टी समर्थक र केही उद्योगीलाई लुकाएर खोप लगाएको भन्दै स्थानीय विरोधमा उत्रिएका हुन् ।

खोपको अभावको कारण जेष्ठ नागरिक र फ्रन्टलाईनमा काम गर्ने स्वास्थ्यकर्मीलाई नै खोप लगाउन समस्या भइरहेको बेला मन्त्रीको सिफारिसमा नीजि सिनेमा हलमा गोप्यरुपमा खोप लगाएको पाइपछि स्थानीयले विरोध गरेका हुन् । शुक्रबार दिउँसो सार्वजनिक सूचनाबिना विराटनगर-२ तीनपैनीस्थित सिनेमा हलमा कोभिसिल्डको दोस्रो डोज दिन लाग्दा स्थानीयले विरोध गरेपछि भागाभाग मच्चिएको थियो ।

विराटनगरको सिटी सिनेमा हलभित्र एमाले कार्यकर्ता र उद्योगीलाई सुटुक्क शुक्रबार दिउसो खोप लगाइन थालेका सुइँको पाएपछि स्थानीयले खोप कार्यक्रम भाँडेका थिए । शुक्रबार दिउँसो १ बजे विराटनगर–२ तीनपैनीस्थित सिटी सिनेमा हल परिसरमा पहुँच पुगेकाहरूलाई कोरोनाविरुद्धको दोस्रो डोज लगाइन थालिएको थियो ।

एमाले समर्थक कार्यकर्ताले हलको गेटमा ताल्चा लगाएर गेटबाट मान्छे छान्दै खोपका लागि भित्र पठाउँदै गर्न थालेपछि स्थानीयले थाहा पाएका थिए । त्यसपछि स्थानीय विरोधमा उत्रिएका थिए । स्थानीयको विरोधपछि भागाभाग मच्चिएको हो । स्थानीयले अग्रपङ्तिमा नखटिएकाहरूले पनि खोप लगाएको भन्दै विरोध गरेका थिए ।

‘प्रदेश सरकारले गोप्य रूपमा पहुँच भएकालाई मात्र खोप दिएपछि हामी आक्रोशित भएका हौँ’, अखिल क्रान्तिकारीका विद्यार्थी नेता ताजिम अन्सारीले भने, ‘सुरक्षाकर्मी, स्वास्थ्यकर्मी, सरसफाईकर्मीसहितका फ्रन्टलाइनरलाई खोप लगाएको भए हामी स्वागत गर्‍याै‍ँ ।’

सामाजिक विकास मन्त्रालयबाट खोप र स्वास्थ्यकर्मी लिएर गएको बा १ झ ९३६५ नम्बरको मन्त्रालयको खोप बोक्ने विवादपछि स्थानीयले १ घण्टा सिनेमाहलको प्राङ्गणमै रोकेर राख्दै बाकी रहेको खोप वडा कार्यालयमा दिन दबाब दिएका थिए । आक्रोस बढ्न थालेपछि प्रहरीले गााडी सहित स्वास्थ्यकर्मीलाई सुरक्षित निकालेको थियो । 

खोप लगाउने बिषयबारे विराटनगर महानगरपालिका समेत अनभिज्ञ रहेको महानगर प्रमुख भीम पराजुलीले बताएका छन् ।