विराटनगर, १६ जेठ । जिल्ला प्रशासन कार्यालय मोरङले पुनः साता निषेधाज्ञा थपिएको छ । कोरोना सङ्क्रमितको सङ्ख्या बढ्नेक्रम यथावतै रहेको भन्दै प्रशासनले जेठ १७ गते राति १२ बजेदेखि लागू हुनेगरी २४ गते राति १२ बजेसम्म निषेधाज्ञा थपेको हो ।

मोरङका सहायक प्रमुख जिल्ला अधिकारी शरदकुमार अधिकारीका अनुसार यो पाँचौँ चरणको निषेधाज्ञा हो । यसअघि गत सोमबार १७ गते राति १२ बजेसम्म लागू हुनेगरी चौथो चरणको निषेधाज्ञा थपिएको थियो ।

तर दोस्रो लहरको कोरोना महामारीमा सङ्क्रमितको सङ्ख्या बढ्नेक्रम कायमै रहेपछि चौथो पटक निषेधाज्ञा जारी गर्नुपरेको प्रजिअ कोषहरि निरौलाले बताए । थप गरिएको अवधिमा कडाई गर्ने निर्णय भएको उनले बताए ।

उनका अनुसार निषेधाज्ञाको अवधिमा औषधि, खाद्यवस्तु, इन्धनलगायत अत्यावश्यक वस्तु तथा सेवाहरू खरिद–बिक्री गर्न छुट छ । त्यस्ता पसल पनि खुला गर्न दिइएको छ । औषधि पसललाई २४सै घण्टा तथा अत्यावश्यक खाद्यवस्तु र तरकारी पसललाई बिहान दस बजेसम्म तथा बेलुकी पाँच बजेदेखि उताको समयमा खोल्न दिइएको छ ।

यता, बैङ्क तथा बित्तीय संस्थालाई नेपाल राष्ट्र बैङ्कले तय गरेको गाइडलाइनअनुसार सञ्चालन गर्न अनुमति दिइएको छ । यस्तै, निर्माणसम्बन्धी कामको हकमा भने सरकारी आयोजनाका कामबाहेक अन्य निजी काममा रोक लगाउने निर्णय भएको छ ।

मोरङमा हाल सङ्क्रमितको सङ्ख्या दस हजार ७ सय १ पुगेको छ । जसमध्ये एक सय ८५ जनाको मृत्यु भइसकेको छ भने २६ सय ६५ सङ्क्रमणमुक्त भइसकेका छन् ।