काठमाडौं, २२ बैशाख । कोरोना भाइरस (कोभिड–१९) को दोश्रो कहर सुरु भएसँगै नेपालमा पनि दिन प्रतिदिन संक्रमितहरुको संख्या बढिरहेको छ । कोरोना माहामारी बढेसँगै सरकारले उपचारकालागि विभिन्न निजि अस्पतालहरूसँग सहकार्य गरिरहेको छ । निजी अस्पतालले एकजना संक्रमित उपचार गरे बापत सरकारले प्रती ब्यक्ति १५ हजार रुपैया उपलब्ध गराउदै आएको छ । तर, निजी अस्पतालले बिरामिसँग समेत पैसा असुल्ने गरेको पाइएको छ ।

काठमाडौंका निजी अस्पतालले पाँचतारे होटल भन्दा महङ्गो शुल्क लिने गरेका छन् । काठमाडौं स्थित काठमाडौं मेडिकल कलेजले प्रति ब्यक्ति हरेक दिन ३० हजार सम्म शुल्क लिने गरेको छ भने आइसियु, चेकअप, पिपिइको छुट्टै शुल्क लिने गरेको छ ।

काठमाडौं स्थित अर्काे निजि अस्पताल ह्याम्स हस्पिटलले हरेक दिन कोरोना संक्रमितसंग ५० हजार सम्म लिने गरेको छ भने औषधिको छुट्टै शुल्क लिने गरेको पाइएको छ ।

त्यस्तै बिराटनगर स्थित नोबेल मेडिकल कलेजले सरकारसँग सहकार्य गरेर निःशुल्क सेवा दिने बताएको भए पनि बिरामिहरूसँग विभिन्न बहानामा शुल्क असुल्ने गरेको छ । नोबेल मेडिकल कलेजले निःशुल्क उपचारका नाममा बिरामीका परिवारसँग पिपिइ, मास्क, सेनिटाइजर र औषधिको छुट्टै रकम असुल्ने गरेको छ ।

सेवाको नाममा ठगी गर्ने यस्ता अस्पतालहरूलाई सम्बन्धित पक्षले कारबाही गर्न नसक्दा गरिब जनताहरु ठगिन बाध्य भएका छन् ।