जुगेश दास

देवानगञ्ज । सुनसरीको देवानगञ्ज गाउँपालिकाको कार्यालयसमेत रहेको बजार क्षेत्रकै मुख्य सडकमा दुई दिनदेखि परेको वर्षाको पानी जमेर आवत-जावतमा कठिनाइ भएको छ । विकास निर्माणको काम समयमा नसकेको र भएको काममा समेत गुणस्तर नभएकाले वैशाखकै वर्षाको पानीमै जलमग्न भएकाले यात्रुलाई आवतजावत गर्न कठिनाइ भएको गुनासो स्थानीयले गरेका छन् ।

देवानगञ्ज गाउँपालिका-२ नम्बर वडा कार्यालयको क्षेत्रमा पर्ने बजारकै इनरुवा कप्तानगञ्ज सडक खण्डको देवानगञ्ज बजार उतरको मुख्य सडकमा बैशाखमै जलमग्न भएकाले यात्रुलाई समस्या भएको स्थानीय वीरेन्द्र मेहताले जानकारी दिए । सडकमा पानी जमेको र निकास नभएकाले पैदद यात्रुदेखि मोटरसाइकलमा हिँडनसमेत हिलो छ्यापिएर जानुपर्ने बाध्यता रहेको एक यात्रुले बताए ।

गाउँपालिका उपाध्यक्ष पुनितादेवी यादवको घरअगाडिनै बाटोको यस्तो दुर्दशा हुँदासमेत मर्मत नगरिनु लजास्पद भएको जसपा देवानगञ्जका नेता बेचन मेहताले बताए । मेहताका अनुसार देवानगञ्ज र इनरुवा जोड्ने मुख्य बाटोकै हाल यस्तो हुँदासमेत गाउँपालिकाको ध्यान न जानुले स्थानीय सरकार दिउँसै सुतेको संज्ञा दिए ।