विराटनगर । फिफा विश्वकप–२०२२ तथा एसियन कप–२०२३ अन्तर्गत दोस्रो चरणको छनोटमा नेपालले आज (सोमबार) बलियो टिम जोर्डनसँग प्रतिस्पर्धा गर्दै छ ।

कुवेतको जाबेर अहमद अन्तर्राष्ट्रिय रङ्गशालामा नेपाल र जोर्डनले खेल्नेछन् ।

यो खेल नेपाली समयअनुसार राति ९ः४५ बजेबाट सुरु हुनेछ ।

यसअघि नेपालले बिहीबार राति चाइनिज ताइपेईविरुद्धको खेलमा २–० गोलको जित निकालेको थियो ।

सोही मनोबल बोकेर मैदान उत्रिने नेपालले जोर्डनमाथि पनि जित निकाल्ने दाउ बनाएको छ ।

छनोट चरणको प्रतिस्पर्धाका लागि कुवेत प्रस्थान गर्नुअघि भने नेपालले इराकसँग मैत्रीपूर्ण खेल खेलेको थियो । जसमा ६–२ ले पराजित नेपाल स्तब्ध भएको थियो ।

समूह ‘बी’ मा दोस्रो स्थानमा रहेको नेपालले ६ खेलबाट ६ अङ्क जोडेको छ । जोर्डन भने १० अङ्कका साथ तेस्रो स्थानमा छ ।

उसले नेपालभन्दा एक खेल कम खेलेको छ ।

शीर्ष स्थानमा अपराजित रहेको अस्ट्रेलिया छ भने दोस्रो स्थानमा कुवेत छ ।

पाँच खेल खेलेको अस्ट्रेलियासँग १५ अङ्क भने ६ खेल खेलेको कुवेतसँग १० अङ्क छ ।

नेपालले विश्वकप छनोटको तेस्रो चरणमा पुग्ने मौका गुमाइसकेको छ ।

तर नेपाललाई बाँकी खेलमा जित निकाल्दै एसियन कप छनोटको तेस्रो चरणमा स्थान बनाउने अवसर रहेको छ ।

नेपालले जोर्डनविरुद्ध हालसम्म तीन पटक खेलेको छ ।

जसमा नेपालले जोर्डनविरुद्ध दुई खेल गुमाएको छ । एक खेल भने बराबरी खेलेको छ ।

नेपाली टिमः

गोलरक्षक – किरण चेम्जोङ, विशाल सुनार र दीप कार्की

डिफेन्डर – रोहित चन्द, अनन्त तामाङ, दिनेश राजवंशी, गौतम श्रेष्ठ, सुमन अर्याल र विकास खवास

मिडफिल्डर – विशाल राई, मनिष डाँगी, एरिक विष्ट, कमल थापा, सन्तोष तामाङ, सुमन लामा, सुनिल बल, सुरजजिउ ठकुरी, पुजन उपरकोटी र आयुष घलान

फरवार्ड – अभिषेक रिजाल, अन्जन विष्ट, नवयुग श्रेष्ठ र आशिष लामा