विराटनगर । प्रदेश नं १ का मुख्यमन्त्री शेरधन राईले प्रदेशमा पहिलो चरणमा तीन लाखले खोप लगाएको जानकारी दिएका छन् । सोमबारबाट सुरु भएको प्रदेशसभाको आठौं तथा बजेट अधिवेशनमा सम्बोधन क्रममा उनले यस्तो जानकारी दिएका हुन् ।

सरकारले कार्यान्वयन गर्न सकिने, यथार्थपरक बजेट ल्याउने उनले बताए । उनले चालु आर्थिक वर्षको बजेट अनुमान भन्दा फरक परेको, कार्यान्वयन गर्न नसकेको, आन्तरिक ऋण उठाउन असफल भएको र त्यसले प्रदेशको वित्तीय अनुशासन खलबलिएको भन्दै बजेट कार्यान्यवयन हुन नसक्नुको कारण मन्त्रालयका पूर्व अर्थमन्त्री भएको आरोप लगाए ।

प्रदेश नै ड्यामेज हुने अवस्थामा पुगेको दावी गर्दै उहाँले धेरै मिहेनत गरेर बल्ल ट्रयाकमा फर्काएको, वित्तीय अनुशासनको अवस्था कमजोर रहेको बताए । यद्यपि उनले सरकारको प्रमुख नेतृत्व भएको नाताले कमजोरीको जिम्मा आफूले लिने पनि बताए । चालु वर्षको अन्तिमसम्ममा प्रदेश सरकारको संचित कोषमा एक रुपैयाँ पनि बचत हुने अवस्था नहरेकोले नयाँ कार्यक्रमहरु राख्न नसक्ने टिप्पणी गरे ।

मुख्यमन्त्री राईले स्रोत अभावका कारण आगामी वर्ष सरकारले नयाँ कार्यक्रमहरु प्रस्ताव नगर्ने भएका कार्यक्रमहरुलाई सम्पन्न हुने गरी बजेट ल्याउने तयारी भइरहेको पनि जानकारी दिए ।

उनले प्रदेशको नामाकरण गर्न दलहरुबीच समझदारी आवश्यक रहेको भन्दै नामाकरण हुन नसक्नुको दोष सबै सांसदहरुले बराबरी लिनुपर्ने जिकिर गरे ।

कुनै दल विशेष, सरकार वा सभामुखका कारणले प्रदेशको नामाकरण हुन नसकेको होइन भन्दै उनले सबै मिलेर नामाकरण गर्नुपर्ने बताए ।

प्रदेश सरकारले ठूलो संख्यामा वहुवर्षे योजनाहरु अघि बढाएको र त्यसो गरेर कमजोरी भएको अनुभूति आफुहरुले नगरेको भन्दै उनले ति योजनाहरु अगाडि नबढाएको भए बजेट खर्च हुने अवस्था नहुने तर्फ पनि हेर्नु पर्ने बताए ।

उनले विकास निर्माणको काम धमाधम भइरहेको भन्दै त्यसलाई स्वभाविक गतिमा अघि बढाउने बताए ।

प्रदेश सरकार जनताको सुरक्षाका निम्ति खोप ल्याउने पहलमा जुटेको र प्राथमिकतामा राखेको, प्रदेशमा पहिलो चरणमा ३ लाख जना भन्दा धेरैले खोप लगाएको र दोश्रो चरणको खोप ५२ हजार जनाले लगाइसकेको मुख्यमन्त्री राईले जानकारी दिए ।

प्रदेश १ का लागि दोश्रो चरणका लागि मात्र दुई लाख ५० हजार डोज खोप आवश्यक परेको तर कोभिसिल्ड तत्काल आउने सम्भावना नरहेकोले छलफल जारी रहेको जानकारी ए ।