फिफा विश्वकप–२०२२ तथा एसियन कप–२०२३ अन्तर्गत दोस्रो चरणको छनोटमा नेपालले जोर्डनसँग हार ब्यहोरेको छ । सोमबार राति कुवेतको जाबेर अहमद अन्तर्राष्ट्रिय रङ्गशालामा भएको खेलमा नेपाल जोर्डनसँग ३–० गोलले पराजित भएको हो ।

जोर्डनको जितमा बाहा फेजल सेइफले दुई गोल गरे भने एजन अल अरबले एक गोल गरे । जोर्डनले तीनवटै गोल फ्रिकिक र पेनाल्टीमार्फत नै सम्भव बनायो । पहिलो हाफको सुरुदेखि नै जोर्डनले आक्रामक खेल पस्केको थियो । तर २३औँ मिनेटमा मात्रै उसले गोलको खाता खोल्न सक्यो ।

नेपालका डिफेन्डर रोहित चन्दले पेनाल्टी क्षेत्रभित्र सुलेमानलाई लडाउन पुग्दा जोर्डनले पेनाल्टीको माैका पाएको थियो । जसमा बाहा फेजल सेइफले पेनाल्टीलाई गोलमा परिणत गरेर जोर्डनलाई १–० को अग्रता दिलाए ।

गोलकिपर किरण चेम्जोङले पेनाल्टी प्रहार रोक्न दायाँ तिर ‘डाइभ’ लगाउँदा बल गोलपोष्ट चुमिसकेको थियो । बाहा फैसलले जोर्डनका लागि आफ्नो २८औँ खेलमा ११ गोल पूरा गरे ।

खेलको २९औँ मिनेटमा डिफेन्डर बिकास खवास घाइते भएर मैदानबाट बाहिरिँदा सुनिल बल मैदानमा प्रवेश गरेका थिए । ३५औँ मिनेटमा सुनिल बलले पेनाल्टी क्षेत्रभित्र दिएको बललाई अञ्जन विष्टले भेट्न नसक्दा नेपाल गोल गर्ने अवसरबाट बञ्चित हुन पुग्यो ।

पहिलो हाफसम्म १–० को अग्रता बनाएको जोर्डनले दोस्रो हाफको सुरुवातमै गोल थप्दै २–० को अग्रता लियो । खेलको ४८औँ मिनेटमा सेइफले फ्रिकिकमा दोस्रो गोल गर्दै जोर्डनलाई २–० गोलको अग्रता दिलाए । ६७औँ मिनेटमा एजान अल अरबले गोल गर्दै जोर्डनको अग्रता ३–० पारे । उनले गरेको हेडिङ गोल नै जोर्डनको नेपालमाथि जितका लागि पर्याप्त भयो ।

जितसँगै जोर्डन समूह ‘बी’ को दोस्रो स्थानमा उक्लिएको छ । उसले ६ खेलमा १३ अङ्क जोडेको छ । चौथो स्स्थानमा रहेको नेपालले ७ खेलबाट ६ अङ्क जोडेको छ ।

नेपालले छनोटको आफ्नो अन्तिम खेलमा अष्ट्रेलियाको सामना गर्नेछ । अष्ट्रेलिया र नेपालबीचको खेल जुन ११ मा हुनेछ । उक्त खेलपछि कुवेत र जोर्डनबीच स्पर्धा हुनेछ । कुवेत र जोर्डनबीचको उक्त खेल विश्वकपका लागि छनोट हुने टोलिको समीकरण पूरा गर्नेछ ।