उदयपुर, १७ असार । बेलका नगरपालिका वडा नं. २, ३, ८, र ९ का पिडितहरूद्धारा नगरपालिकाको कार्यालयमा तोडफोड गरेका छन् ।

नेपाल सरकारले बेलका नगरपालिका ३ स्थित कोशी टप्पुको करिव १७६ दशमलव २३ हेक्टरमा कबुलियत वन बनाउने निर्णय गरेसँगै आन्दोलित भएका स्थानियले कार्यालयमा तोडफोड गरेका हुन् ।

तोडफोडबाट नगरपालिकाको अगाडीको भागको सिसा साथै प्रमुख प्रशासकीय अधिकृत चढ्ने गाडीमा क्षति पुगेको छ ।

उनिहरूले वर्षौ देखि भोगचलन गर्दै आएको जग्गा सरकारले जेठ ६ गते कबुलियत वन बनाउने निर्णय गरेको थियो । सरकारको उक्त निर्णयसँगै २० हजार जनसंख्या विस्थापित हुनुपर्ने अवस्था आएको भन्दै स्थानिय आन्दोलनमा उत्रिएका हुन् ।

कबुलियती वन ठेक्का लिने बराह हर्बल एण्ड एग्रो प्रालि सुनसरीका संचालक निलहरि काफ्लेले उठाउने प्रयास गरेपछि स्थानीयहरू नगरपालिका घेर्न पुगेका हुन् ।

आन्दोलनमा उत्रिएका स्थानियहरूले नगरपालिकामा ढुंगामुढा गर्न थालेपछि प्रहरीले १५ राउण्ड अश्रु ग्यास समेत प्रहार गरेको थियो । यस्तै ६ राउण्ड हवाई फायर समेत गरेको थियो ।

आन्दोलनकारी र प्रहरी विच भएको झडपमा १० जना घाइते भएका छन् । उनीहरूको स्थानीय अस्पताल र केहीलाई विपी कोइराला स्वास्थ्य विज्ञान प्रतिष्ठान धरानमा उपचारको लागि लगिएको छ । यस्तै १४ जना आन्दोलनकारीलाई प्रहरीले पक्राउ गरेको छ ।