कटवाल दीपक

धरान, २७ असार । मधुशाला उर्फ मधुकर शाक्यको चल्दै गरेको जिन्दगी । धरान – ७ वुद्धमार्गमा ३५ बर्षदेखि चियापसल सञ्चालन गर्दै आइरहेका शाक्यको पसलमा चिया पिउने मान्छे मात्र आँउदैनन् । पुस्तक पारखीहरू पनि आँउछन । उनले अरुले भन्दा फरक तरिकाले चियापसल सञ्चालन गरिरहेका छन् ।

उनको पसलमा चिया पिउनमात्र हैन साहित्यका पुस्तकहरू पढ्न पनि पाइन्छ । उनले चियापसल सञ्चालन गर्दाको समयमा मनोरञ्जको साधन अखबार र पुस्तकहरू मात्र हुने गथ्र्यो । विवाह गरिसके पछि उनको चियापसल खोल्ने मनसाय आयो श्रीमतीले समेत उनलाई साथ दिईन् । मधुशाला बाट उनले दाममात्र हैन नाम र इज्जत पनि कमाए ।

बाह्र बर्षदेखि चियापसलमा पुस्तकालय

‘दिल लगाउनु छ भने पुस्तकमा लगाउ धोका दिएछ भने पनि योग्य बनाएर छोड्छ ।’

माथी लेखिएका हरफहरू शाक्यले जिवनमा आत्मसात् गरेका छन् । १२ बर्ष अघिको समयमा मनोरञ्जनको साधन पत्र–पत्रिका र पुस्तकहरू मात्र थियो । युवापुस्तामा पठन संस्कृतिको बिकासमा थप टेवा पुगोस् भन्ने मनसायले चियापसलमा पुस्तकालय स्थापना गरेको उनले सुनाए ।

विस्तारै उनको पसलमा सामान्य मान्छे मात्र हैन पुस्तक प्रेमि र धरानका चिनिएका साहित्यकारहरू समेत साँझबिहान आउन थाले । शाक्य आफै पनि साहित्यकार हुन । उनका थुप्रै गजल, कविता र हाइकु विभिन्न पत्र–पत्रिकाहरुमा प्रकाशन भईसकेका छन् । उनी एउटा कविता संग्रह प्रकाशन गर्ने सोचमा छन् । मधुशालामा आउने साहित्यकार र शुभचिन्तकहरूले बेला बेलामा पुस्तकउ पहार समेत ल्याइदिने गरेका छन् । अचेल उनको पसलमा बिशेषगरी युवायुवतीहरुरू पनि चियापिउँदै पुस्तक पढ्न आउने गरेका छन् ।

परिवारको सहयोग

शाक्य दम्पतीका दुई छोरा र एक बुहारी गरी ५ जनाको परिवार छ । दुई दम्पतीको जिन्दगी नै मधुशाला हो । छोराहरू आफ्नै व्यावसाय गर्छन । पिताले गरेको व्यावसाय प्रति छोराहरू गर्व गर्छन । मधुकर शाक्यको सबैथोक हो मधुशाला । विवाह अगाडी शाक्य बेरोजगार थिए । विवाह पछि श्रीमतीले उनलाइ साथ दिईन । ३५ बर्षदेखी शाक्य दम्पतीले मधुशाला चलाउँदै आइरहेका छन् ।