लहान, १७ साउन । कोरोना भाइरस विरुद्धको खोपमा लापरवाही बढेको छ । लहान ७ स्थित शुक्रवार संचालन गरिएको खोप कार्यक्रममा गिरिराज शर्माको नाममा अर्कै व्यक्तिले खोप लगाएपछि चासोको विषय बनेको छ ।

२०२८ माघ २८ गते जन्म मिति रहेको गिरिराज शर्माको नामममा ४६ बर्ष उमेरका एक व्यक्तिलाई खोप लगाएको खुलासा भएको छ । गिरिराज शर्माले भने, ‘मेरो नाममा कसरी अरुले खोप लगायो ।’ ‘यहाँ त खोप विक्री समेत भइरहेकोले मेरो नामको खोप अरुले लगाएको हुनुपर्छ ।’

लहान नगरपालिकाका स्वास्थ्य अधिकृत रामसुन्दर यादवले यसबारे आफुलाई केही थाहा नभएको बताए । लहान ७ स्थित खोपको जिम्मा हेल्पोष्ट इन्चार्ज रामानन्द चौधरीलाई दिएको थियो । ‘उनीहरूले नै यस्तो लापरवाही गरेको हुनुपर्छ । यसवारे खोजतलास जारी छ । दोषीलाई कारवाही हुनुपर्छ’, अधिकृत यादवले भने, ‘अहिले ५० बर्षमाथी उमेर समुह, सरसफाईकर्मी र स्वास्थ्यकर्मी समूहको लागि खोप लगाउँने कार्यक्रम रहेको छ । तर, अरुकै नाममा यसरी खोप लगायो भने पक्का आर्थिक चलखेल भएको हुनुपर्छ ।

गिरीराज शर्माको नाममा लगाएको खोप कार्ड नम्बर ८२ रहेको छ भने रन्जना साहको हस्ताक्षर रहेको छ ।

लहानमा खोप कर्मचारीहरू आर्थिक प्रलोभनमा परेर भारतीय नागरिक र समुह बाहिरका व्यक्तिलाई खोप बेच्ने गरेको आरोप छ । यो भन्दा अगाडि पनि लहानमा खोप विक्री भएको पाईएको थियो ।