विराटनगर / नेपाली प्रशिक्षक मनिष तिम्सिना भारतको आई लिग च्याम्पियन गोकुलम केरेला एफसीको गोलरक्षक प्रशिक्षक नियुक्त भएका छन् ।
एएफसी ए लाइन्स कोर्षमा सहभागी भएका ३३ वर्षीय तिम्सिना र केरेलाबीच सन् २०२१–२२ को सिजनका लागि सम्झौता भएको हो । सम्झौताअनुसार उनी सन् २०२२ मे अन्तिमसम्म क्लबमा आबद्ध रहनेछन् । आई लिग टोलीमा कुनै पनि नेपाली प्रशिक्षक आबद्ध भएको यो पहिलो अवसर हो । गोकुलम त्यही टोली जसको महिला टोलीले महिला आई लिग जित्दा त्यसबाट नेपाली राष्ट्रिय टोलीकी सावित्रा भण्डारीले खेलेका थिइन् । गत सिजन गोकुलमको महिला र पुरुष दुवै टोलीले लिग उपाधि जित्न सफल भएको थियो ।
तिम्सिनाले आई लिग टोलीको गोलकिपर प्रशिक्षक नियुक्त हुनुलाई आफ्नोसँगै नेपाली फुटबलका लागि पनि खुसीको खबर भएको बताएका छन् । तिम्सिनालाई अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाले विदाई गरे ।
एन्फाको धरान एकेडेमीका गोलकिपर प्रशिक्षकका रुपमा कार्यरत ३३ वर्षे तिम्सिनाले खेलाडीका रुपमा थ्री स्टार, आरसिटी, हिमालयन शेर्पा, बाँसबारी, स्वयम्मु, ब्रिगेड ब्वाइजबाट खेलिसकेका छन् ।
पूर्वाञ्चलबाट पाँचौ राष्ट्रिय खेलकुदमा स्वर्णपदक जितेका मनिष आठ वर्षयता प्रशिक्षणमा सामेल छन् । विराटनगरका उनले साफ यू १५ मा नेपाली टोलीको गोलकिपर प्रशिक्षकको भूमिका पनि निर्वाह गरिसकेका छन् ।