विराटनगर । दिक्तेल रुपाकोट मझुवागढी नगरपालिका–३ मुढेस्थित काँडे बस्ने २३ बर्षीय नारायण थापाले आफ्नै माईला दाजुलाइ भैंसी बाँध्ने नाईलनको डोरीले घाँटीमा कसेर हत्या गरे ।

घर नजिकैको सल्लाघारीमा रहेको भोटेपिपलको रुखमा घाँटी कसी ३३ बर्षीय गिरिराज थापाको हत्यामा संलग्न भएको अभियोगमा मृतककै भतिज पर्ने १५ बर्षीय एक किशोरलाई सहित अभियुक्त नारायणलाई प्रहरीले पक्राउ गरे ।

असार १३ गते भुईंमा उज्यालो नखस्दै दिक्तेल सोल्माका सुवर्ण राईले आफ्नो बयोबृद्दा बुवाको हत्या गरे । दिक्तेल रुपाकोट मझुवागढी नगरपालिका–२ मा पर्ने सोल्माका २० बर्षीय राईले बिहानको अन्दाजी ४ बजे खुकुरी प्रहार गरी ७५ बर्षीय बुवा चन्द्रकुमार राईको हत्या गरेको जिल्ला प्रहरी कार्यालय खोटाङका तत्कालिन प्रहरी निरीक्षक अमरप्रसाद गजमेरको भनाइ छ ।

छोराले बुवाको किन हत्या गरेको भनेर कारण खुल्न सकेको छैन । यद्यपी, राती सुतेको समयमा आफुलाई बुवाले मारेको सपना देखेकोले वुवाको हत्या गरेको भन्ने गाउँमा हल्ला चलेको स्थानीय बताउँछन् । तत्कालै पक्राउ गरिएको सुवर्णलाई कानुनी कार्वाहीको दायरामा ल्याइएको प्रहरीले जनाएको छ ।

हलेसी तुवाचुङ नगरपालिका–९ सल्लेस्थित चिचिङ्गाकी २१ वर्षीया शिक्षा राई मृत अवस्थामा फेला परेपछि उनका श्रीमान् मनकुमार राई पक्राउ परेका छन् । भदौ–७ गते राती मृत फेला परेका राईलाई उनकै श्रीमानले हत्या गरेको आफन्तको दाबी छ ।

राई घरको बरण्डामा झुण्डिएको अवस्थामा फेला परेको भनिए पनि झुण्डिएको या झुण्ड्याईएको केही पनि नभएर हत्या भएको आफन्तको जिकिर छ ।

घटनाको खबर पाउनासाथ भोलिपल्ट बिहान माइतीपक्ष शिक्षाको घर पुग्दा उनको शव भुईंमा राखिएको र डोरी मात्र झुण्डिएको देखाईएको मृतकका काका ज्ञानबहादुर राईको भनाई छ ।

शव शंकास्पद अवस्थामा देखिएकाले उनको श्रीमानविरुद्द कर्तव्य ज्यान सम्बन्धी मुद्दाको किटानी जाहेरी दिइएको मृतकका काका ज्ञानबहादुर राईले बताए । मृतकका श्रीमानविरुद्ध कानूनी कारवाही गरी पाउँ भनेर प्रहरीमा किटानी जाहेरी दिएको आफन्तको भनाई छ । तर प्रहरीले हत्या भएको होईन भन्दै जाहेरी लिन नमानेको आफन्तको सुनाउँछन् ।

किटानी जाहेरी लिन नमानेपछि अन्य न्यायिक निकायमा जाने परिवारको तयारी छ । घटनास्थलमा आफू स्वयम् पुगेर हेर्दासमेत उनको हत्या भएको नदेखिएको प्रहरी निरीक्षक सागर साहको दाबी छ । अनुसन्धानको क्रममा हत्या नै भएको रहेछ भन्ने पुष्टि भएमा हत्या गरेको किटानी जाहेरी मागेर कारवाहीको प्रक्रिया अगाडि बढाउने साहले स्पष्ट पारे ।

पछिल्लो समय खोटाङ जिल्लामा भएका हत्याका अधिकांस घटनामा आफन्त र नातागोता कै संलग्नता भएको पाइएको छ । विभिन्न वाहाना आफ्नै परिवार भित्र हत्या, हिँसाको घटना बढ्दै गइरहेको छ ।