विराटनगर । नेपाल–भारत उद्योग वाणिज्य संघ प्रदेश–१ को अध्यक्षमा अविनाश बोहरा निर्वाचित भएका छन् ।

विराटनगरमा भएको संघको तेस्रो वार्षिक साधारणसभाले अध्यक्षमा बोहरासहित १५ सदस्यीय कार्यसमिति सर्वसम्मत रुपमा चयन गरेको हो । संघको प्रथम उपाध्यक्षमा मुकेश उपाध्याय (भट्टराई), द्वितीय उपाध्यक्षमा श्याम पौडेल, महासचिवमा रमेशकुमार राठी र कोषाध्यक्षमा विकास चौधरी चयन भएका छन् ।

त्यसैगरी बाँकी १० सदस्यहरूमा बेनीगोपाल मुन्दडा, यादव पोखरेल, विजयकुमार डाल्मिया“, गायत्री भण्डारी, सन्तोषकुमार चौधरी, श्रवणकुमार अग्रवाल चयन भएका छन् । विधानअनुसार अध्यक्षले चारजना सदस्य मनोनीत गर्न सक्ने व्यवस्थाअनुसार अध्यक्षमा निर्वाचित बोहराले थप चारजनालाई कार्यसमितिमा मनोनीत गरेका छन् । मनोनीत हुनेमा सोम अधिकारी, विनोद बस्नेत, महेश पौडेल र रविन दाहाल छन् । सदस्यमा चयन भएका अधिकारीले नेपाल–भारत व्यापार सन्धीको मस्यौदा निर्माणमा योगदान गरेको जनाइएको छ ।

निर्वाचित अध्यक्षसहित कार्यसमितिका पदाधिकारीलाई गुणराज घिमिरे, मदन खनाल, श्याम भण्डारी र सोम तिम्सिना सम्मिलित निर्वाचन समितिले प्रमाणपत्र प्रदान गरेको छ । त्यसैगरी संघका निर्वतमान अध्यक्ष ललितकुमार लोहियाले खादा र माला लगाइदिएर कार्यकाल सफलताका लागि बधाई ज्ञापन गरे । अध्यक्षमा निर्वाचित बोहराले भारतस“गको बढ्दो व्यापार घाटा न्यूनीकरणका नेपाली उद्योगका मालवस्तु निर्यातमा आइपर्ने समस्यामा गर्दै लगिने बताए । उनले नेपाली उत्पादनको निर्यात विस्तारै बढ्न थाले पनि त्यसलाई प्रतिस्पर्धी रुपमा अघि बढाउन वाणिज्य तथा व्यापार क्षेत्रको समस्या पहिचान गर्ने र दुई पक्षीय रुपमा भन्सार सहजीकरण गरिने प्रतिबद्धता जनाए ।

साधारणसभाको उद्घाटन संघकी केन्द्रीय अध्यक्ष सिर्जना राणाले भर्जुअल माध्यमबाट गरेकी थिइन् । उनले नेपाल–भारत अर्थ सामाजिक व्यवस्थालाई अझ प्रगाढ बनाइने र औद्योगिक विकास तथा दुई देशीय आर्थिक क्रियाकलाप अभिवृद्धि गर्न संघले पहल गर्दैै आएको बताइन् । अध्यक्ष राणाले नेपालको जनकपुर पर्यटकीय सर्किट, लुम्बिनी सर्किट, पशुपतिनाथ सर्किटको विकासमा भारतस“ग सहकार्य गर्न सकिने बताइन् । संघकै अगुवाईमा काठमाडौं–कलकत्ता फोरमको आयोजना गर्न लागिएको पनि जानकारी दिइन् ।

भारतको जोगबनी भन्सार कार्यालयका सहायक कमिस्नार अशोक दासले जोगबनी नाकाबाट हुने व्यापार प्रवद्र्धनमा अवरोधका रुपमा रहेको मिरगञ्ज पुल चा“डै निर्माण सम्पन्न हुने जानकारी दिए । त्यसका लागि नेपालतर्फको भन्सार कार्यालयस“ग पनि समन्वय गरेर काम गरिरहेको बताए ।

भन्सार कार्यालय रानीका निमित्त प्रमुख अमित तिवारीले भन्सारले राजस्व संकलनका लागि साथै व्यापार सहजीकरणको कामलाई त्यतिकै प्राथमिकतामा राखेको दाबी गरे । उनले विराटनगर भन्सार कार्यालय अहिले अत्याधुनिक रुपमा सेवा प्रदान गरिरहेको बताए । तिवारीले भन्सारमा बेलुका ५ बजेभित्र आइपुगेको कच्चा पदार्थलाई सकेसम्म त्यही दिन पास गरेर नेपाली उद्योगसम्म पुर्याउनका लागि भन्सारले भूमिका निर्वाह गरिरहेको बताए । साथै भन्सारभित्रै अत्याधुनिक ल्याब निर्माण भइरहेकाले ल्याब परीक्षणकै कारण कतिपय वस्तुको आयात निर्यातमा देखिने गरेका समस्या हट्ने आश्वासन दिए ।