इटहरी : जिल्ला अस्पताल इनरुवा सुनसरीका डाक्टरहरू आन्दोलित बनेका छन् । सामाजिक सञ्जालमार्फत चिकित्सकको चरित्र हत्या र अस्पतालको बद्नाम गर्न खोजिएको भन्दै सुनसरीका डाक्टरहरू आन्दोलित बनेका हुन् ।
मेडिकल सुपरिटेन्डेन (मेसु) देवराज घिमिरेसहितका डाक्टरहरूले जिल्ला प्रशासन कार्यालय सुनसरीमा धर्ना दिएका हुन् । उनले उपचार गराउन आएकी व्यक्तिमा चेकजाँचका क्रममा मुटुको समस्या रहेकाले अन्यत्र उपचार गराउन भनिएपनि इनरुवा अस्पताल र डाक्टरमाथि गम्भीर लाञ्छना लगाएकाले आफूहरू आन्दोलित बनेको बताए ।
उनले भने, ‘परिवारले बिरामीलाई उपचारका लागि काठमाडौंको शहीद गंगालाल हृदय रोग प्रतिष्ठानमा उपचारका लागि पु¥याएका रहेछन् । त्यहाँको रिपोर्टलाई आधार मान्दै पशुपति दाहालले इनरुवा अस्पताल र डाक्टर उपर गम्भीर आरोप लगाउँदै सामाजिक सञ्जालमा पोष्ट गरेको पाइयो । जस पश्चात सामाजिक सञ्जालमा आफूहरू उपर गालीगलौज, मानहानी, धम्कीपूर्ण भाषा प्रयोगको क्रम बढेकाले सत्यतथ्य छानबिन गरी कारबाहीको माग सहित आन्दोलित बन्न बाध्य भएका हौं ।’
प्रशासनमा धर्ना बसेका डाक्टरहरूले आफूहरूको सम्मानमा चोट पुग्ने खालका अभिव्यक्ति दिने सामाजिक सञ्जाल प्रयोगकर्ता पशुपति दाहालमाथि कारबाहीको माग गर्दै सुनसरीका प्रमुख जिल्ला अधिकारी इन्द्रदेव यादव समक्ष ज्ञापन पत्र बुझाइएको घिमिरेले बताए । प्रजिअ यादवले ज्ञापनपत्र बुझ्दै स्वास्थ्य सेवा र सेवा प्रवाहमा खटिने डाक्टर लगायत स्वास्थ्यकर्मीको सुरक्षा र अधिकारको सवालमा प्रशासन प्रतिवद्ध रहेको बताए ।
Post Views: 7