विराटनगर । प्रहरी हिरासतमा रहेका थुनुवाको मृत्यु भएपछि विराटनगरमा प्रदर्शन भएको छ । गाँजासहित पक्राउ परेका विराटनगर महानगरपालिका–११ का ३९ वर्षीय भीम कामतको मृत्यु भएपछि आफन्तहरूले प्रदर्शन गरेका हुन् ।

प्रहरीको यातनाका कारण मृत्यु भएको भन्दै आफन्तले सोमबार आफन्त र स्थानीयले जिल्ला प्रशासन कार्यालयअगाडि प्रदर्शन गरेका हुन् । ‘मेरो देवरलाई चरम यातना दिएर हत्या गरिएको छ’, मृतककी भाउजु मीनादेवी कामतले भनिन्, ‘प्रहरीले यसरी मान्छे मार्न पाउँछ रु हामीलाई तपाईँको मान्छे आइसियुमा छ भनेर बोलाइएको थियो । हेर्न जाँदा मरिसक्यो भन्छ ।’

यता, जिल्ला प्रहरी कार्यालय मोरङका डिएसपी दीपक श्रेष्ठका अनुसार आइतबार बिहान अचानक बिरामी परेका कामतलाई उपचारका क्रममा कोसी अस्पतालमा मृत्यु भएको जनाए । अस्पतालमा उपचारका क्रममा दिउँसो करिब साढे १ बजे मृत्यु भएको उनले बताए । मृत्युको कारण पोष्टमार्टमपछि थाहा हुने उनले बताए ।

प्रहरीले शुक्रबार कामतलाई उनकै घरबाट तीन किलो चार सय ८० ग्राम गाँजासहित पक्राउ परेका थिए । कामत जनपथ मार्गमै नास्ता पसल सञ्चालन गर्थे । कामतको आइतबार दिउँसो मृत्यु भएको थियो । मृतक कामतको खुट्टामा गम्भीर चोट छ । प्रहरीले यातना दिएर मारेको दाबी गर्दै आफन्त र स्थानीयले शव नबुझी प्रदर्शन गरेका हुन् ।