विराटनगर । नेपाली युरोपियन खेलकुद संघ एनआइएससीको आयोजनामा आगामी नोभेम्बर ७ तारिखमा खुल्ला भलिबल प्रतियोगिता हुने भएको छ ।
युरोपमा रहेका नेपालीहरूबीच सद्भाव र भाइचारा अभिवृद्धि गराउने उद्देश्यका साथ एनआइएससीको आयोजनामा अष्ट्रियाको जोसेफ प्रेरिस अली ३, ५०२० साल्बु्रङमा प्रतियोगिता हुन लागेको हो । प्रतियोगितामा विभिन्न टिमको सहभागिता रहनेछ ।

‘स्वास्थ्यका लागि खेलकुद’ भन्ने मूल नाराका साथ आयोजना हुन लागेको प्रतियोगितामा प्रथम हुने टिमलाई १ हजार युरो र द्वितीय हुने टिमलाई ३ सय युरो पुरस्कारसहित प्रमाणपत्र र ट्रफी प्रदान गरिने एनआइएससीका अध्यक्ष दिलकुमार घमालले जानकारी दिए ।
उनका अनुसार लगातार ३ वर्ष विजयी हुने टिमलाई नगद २ हजार युरोसहित ट्रफी प्रदान गरिनेछ । प्रतियोगितामा सहभागिता हुने टिम दर्ता अक्टुबर २५ तारिखभित्र गरिसक्नुपर्ने अध्यक्ष घमालले बताए । घमालका अनुसार तोकिएको समयभित्र उपस्थिति नहुने टिमले प्रतियोगितामा सहभागिता हुन पाउने छैन ।

“खेलकुदका माध्यमबाट युरोपमा रहेका नेपालीहरूबीच चिनजान हुनुका साथै विदेशमा रहेर पनि नेपालीहरूले मुलुकको कला र संस्कृतिको विकासमा योगदान दिइरहेका छन् भन्ने प्रस्ट हुन्छ,” अध्यक्ष घमालले भने । , “प्रतियोगितामा सांस्कृतिक नृत्यसमेत प्रस्तुत हुनेछ । जहाँ बसेर जे गरे पनि जन्मभूमि र कर्मभूमिकै लागि गरिरहेका हुन्छौं ।” खेलकुदलाई आत्मसात गरेमा मान्छेले महँगो हिरा, मोती, सुन, चाँदी लगाउनै नपर्ने घमालको भनाइ छ । खेलकुदलाई पनि गहनाका रुपमा आत्मसात गरेमा जीवन सार्थक हुने उनको विचार छ । “खेलकुदले मानिसको शारीरलाई स्वस्थ राख्न मद्दत गर्छ,” अध्यक्ष घमाल भन्नुहुन्छ, “यदि मानिसको शरीर नै स्वस्थ छैन भने अर्बौं धनसम्पत्ति भएर पनि के गर्नु रु अर्कातर्फ खेलकुदले आपसी सम्बन्ध बढाउनुका साथै मनलाई शान्ति प्राप्त हुन्छ ।”
टिमलाई निमन्त्रण, खेल स्थानको टुंगो, पुरस्कार र ट्रफीको व्यवस्थापनलगायतका कामहरू अन्तिम चरणमा पुगेको घमालले बताए। कार्यक्रममा उपस्थित जनाएर आयोजक र खेलाडीलाई हौसला प्रदान गर्न युरोपमा रहेका नेपालीलाई आह्वानसमेत उनले गरे।

आयोजकका तर्फबाट खेलाडीको टुंगोसमेत लागिसकेको छ । प्रतियोगितामा आयोजकका तर्फबाट अध्यक्ष घमालसहित राजु विश्वकर्मा, अंग शेर्मा, प्रेम रसाइली, ख्याम विश्वकर्मा, रोहित विश्वकर्मा, गर तेम्बा शेर्मा, इल्विन हुम्यान मैदानमा उत्रिनेछन् । यसैबीच, एनआइएससीको रिक्त रहेको सचिवमा शिव खड्कालाई मनोनीत गरिएको छ । घमालको अध्यक्षतामा एक वर्षअघि गठन भएको एनआइएससीमा सचिव पद रिक्त रहेको थियो । केही समयअघि बसेको एनआइएससीको बैठकले खड्कालाई सचिवमा मनोनीत गरिएको घमालले जानकारी गराए ।