कोरोना भाइरस महामारीका कारण लामो समययता सिनेमा हलरू बन्द गर्नु परेपछि समस्यामा रहेका हल सञ्चालकहरुले राहतको सास फेरेका छन् । सरकारले दसैँबाट हल खोल्न दिने निर्णय गरेपछि फिल्म नपाएका कारण सुर्ताइरहेका हल सञ्चाकलले निर्माता दसैँमा फिल्म चलाउन राजी भएपछि राहत महसुस गरेका हुन् । हल सञ्चालकहरु दसैँको फूलपातीबाट सिनेमा घर खुल्ने र कोभिडको प्रभाव पूर्ति गर्नेमा विश्वस्त बनेका हुन् ।

सरकारले निषेधाज्ञाका कारण बन्द रहेका उपत्यकाका सिनेमा घरलाई असोजको दोस्रो हप्तादेखि खुल्न दिने निर्णय गरेको थियो । तर कोरोना महामारी कायमै रहेको अवस्थामा फिल्म लगाउँदा दर्शकको अभावका कारण घाटा हुनसक्ने भन्दे फिल्म निर्माताहरू पछि सरेको अवस्था थियो । अब नेपाली निर्माताहरूले दसैँलक्षित गरेर चलचित्र प्रदर्शन गर्ने तयारी थालेपछि उनीहरू खुसी देखिएका हुन् ।

चलचित्र सङ्घ प्रदेश १ का अध्यक्ष चैतन्य बराल फिल्म भएको खण्डमा आफूहरू असोजको दोस्रो साताबाट सिनेमा हल खोल्न तयार रहेको बताए । सरकारी स्वास्थ्य सुरक्षाको मापदण्ड अपनाएर सिनेमा हल खोल्न तयार रहेको बताउँदै उनी भन्छन्, ‘कोभिडका कारण मर्कामा परेका थियौँ । अब उस्किन्छौँ भन्ने आशा पलाएको छ ।’

उनका अनुसार अहिले प्रदेश १ मा हाल ३१ वटा हलहरू बन्द अवस्थामा छन् । विराटनगरमा मात्र हाल ६ वटा सिनेमा घरहरू सञ्चालनमा छन् । तीन उच्चस्तरीय मल्टिप्लेक्स र तीन परम्परागत प्रविधिमा आधारित हलहरू विगत दुई वर्षयता सञ्चालनमा आउन सकेका छैनन् । विराटनगरमा २०७४ जेठदेखि तीनपैनी चौकस्थित सिटी सिनेमा, २०७५ मङ्सिरदेखि मेनरोडस्थित सेन्ट्रल मल्टिप्लेक्स र २०७६ मङ्सिरदेखि धरान रोडस्थित भाटभटेनीमा सुपरमार्केटमा क्युएफएक्स मल्टिप्लेक्स सञ्चालनमा आएको थियो ।

पछिल्लो ५ वर्षयता सञ्चालनमा आएका यी तीन मल्टिप्लेक्सहरूमा मात्रै कुल ३८ करोडको लगानी छ । तर अन्य ९० प्रतिशत सेवाका क्षेत्रहरू खुलिसकेपनि सिनेमा हल सञ्चालनको सवालमा भने सरकारी तदारुकताको अभावमा हलहरू अभूतपूर्व जोखिममा परेको चलचित्र महासङ्घ प्रदेश १ का अध्यक्ष अरुण प्रधान बताउँछन् ।

दसैँ–तिहार नजिकिँदै गर्दा सिनेमा हलहरू खुल्नु भनेको फिल्म क्षेत्रलाई चलायमान बनाउने एउटा राम्रो अवसर पनि हो । चाडपर्वको मौका छोपेर केही वर्षअगाडि फिल्महरूको भाले जुदाइ हुने गरेको थियो । तर २०७६ चैत्र ११ गते सरकारले देशव्यापी लकडाउन जारी गर्दै सिनेमा हल सञ्चालनमा रोक लगाएसँगै सिने क्षेत्रले चर्को मार खेप्नु परेको छ ।

२०७७ को फाल्गुन मसान्ततिर सङ्क्रमणको जोखिम केही हदसम्म न्यूनीकरण भएसँगै आवश्यक स्वास्थ्य सर्तकताका साथ हलहरू सञ्चालनमा आएका थिए । तर महिना दिन पनि नबित्दै सङ्क्रमण दर पुनः बढ्न थालेपछि सरकारी निर्देशनबमोजिम बन्द भएका मल्टिप्लेक्स र अन्य सिनेमा हलहरू हालसम्म सञ्चालनमा आउन सकेका छैनन् ।

पछिल्लो केही समययता कोरोना महामारी र एमेजोन प्राइम भिडियो, नेटफ्लिक्स, आइफ्लिक्स, हटस्टार, जी फाइभ, नेट टिभी जस्ता अनलाइन प्लाटफर्मका कारण करोडौँको लगानीसहित सञ्चालनमा आएका मल्टिप्लेक्सहरू आर्थिक सङ्कटमा पर्दै गएका छन् ।