साफ च्याम्पियनसिप १३औं संस्करणको तेस्रो खेलमा नेपाल भारतसँग पराजित भएको छ । आइतबार राति सर्वाधिक धेरै सात पटकको विजेता टिम भारतसँग भिडेको नेपाल १–० गोलले स्तब्ध भएको हो ।

राजधानी मालेस्थित राष्ट्रिय रङ्गशालामा भएको खेलमा भारतलाई जिताउन कप्तान सुनिल क्षेत्रीले निर्णायक गोल गरे । पहिलो हाफ गोलरहित बराबरीमा सकिएको उक्त खेलको ८२औँ मिनेटमा क्षेत्रीले गोल गर्दै भारतलाई जिताए ।

सुरुवातदेखि नै नेपालले रक्षात्मक रणनीतिलाई कायम राख्दै अन्त्यसम्म पनि भारतलाई बल पोजिसनमा कुनै दवाव दिएको थिएन ।
पहिलो हाफदेखि नै भारतले सिर्जना गरेको आक्रमणलाई कप्तान किरण चेम्जोङले विफल बनाउँदै आएका थिए ।

खेलको ३४औं मिनेटमा नेपालको खाली पोष्टमा भारतका कप्तान सुनिल क्षेत्रिले गोल गर्न नसक्दा नेपाल पछि पर्नबाट जोगिएको थियो ।

पहिलो हाफ गोलरहित बराबरीमा खेलेको नेपाल दोस्रो हाफको ८२औं मिनेटमा फारुख चौधरीको हेडरलाई क्षेत्रीले गोलमा परिणत गरेपछि १(० गोलले भारतसँग पराजित हुन पुगेको हो ।

यस हारपछि नेपाल नेपाल तीन खेलमा ६ अंकसहित शीर्ष स्थानमै छ भने भने तीन खेलमा समान ६ अंक बोकेको माल्दिभ्स दोस्रो स्थानमा छ ।

त्यसैगरी हिजोको जीतसँगै तीन खेलमा पाँच अंक लिएर भारत तेस्रो स्थानमा र बंगलादेश तीन खेलमा चार अंकसहित चौथो स्थानमा रहेको छ । अब नेपालले अन्तिम चरणको खेलमा आउँदो बुधबार बंगलादेशसँग प्रतिस्पर्धा गर्नेछ । सोही दिन भारतले माल्दिभ्ससँग खेल्दैछ ।

यदि नेपालले बुधबारको खेलमा बंगलादेशसँग जीत वा बराबरी मात्र गर्न सकेको खण्डमा पनि नेपालको फाइनल यात्रा सुनिश्चित छ । नेपाल र बंगलादेशको खेल पर्सि बुधबार दिउँसो ४।४५ बजेदेखि माले राष्ट्रिय रंगलशालामा खेलिंदैछ ।