विराटनगर । विराटनगरको हिमालय रोड अन्तर्गत महेन्द्र चोक देखिपूर्वको सडक नबन्दा सर्बसाधरणले सास्ति भोग्न बाध्य छन् । लामो समयदेखि अलपत्र सडक निर्माणमा सम्बन्धित निकायको ध्यान नजाँदा स्थानिय ब्यापारी पनि समस्यामा परेका छन् ।

सडकमा उड्ने धुलोका कारण पसलमा बस्न समस्या भएको पुस्तक व्यवसाय संचालन गर्दै आएका दीपेन्द्र घिमिरेले बताए । लामो समयदेखि समस्या भोग्दै आएको भएपनि सम्बन्धित निकायले सडक बनाउन ध्यान नदिएको उनले गुनासो गरे ।

करिब दुई वर्षदेखि अलपत्र छाडीएको सडक अहिलेसम्म निर्माण हुन नसकेको उक्त स्थानका पुस्तक व्यवसायी लक्ष्मी अधिकारीले बताईन् । महानगरका प्रमुख भिम पराजुलीले पटक पटक निर्माणको आश्वासन दिए पनि सडक बन्न नसकेको उनले बताईन् ।

दैनिक धुलोमा बस्न बाध्य हुँदा स्वास्थ्यमा समेत असर परेको उनको भनाई छ । धुलोकै कारण व्यवसायमा समेत समस्या भएको उनको गुनासो छ ।

विराटनगरको मुटुमा रहेको सडक लामो समय बन्न नसक्नु दुःखद भएको उनले बताईन् ।

उक्त स्थानमा पुस्तक व्यवसाय संचालन गर्दै आएका तुलसी रेग्मीको गुनासो पनि उस्तै छ । पसलमा भएका किताब सबै धुलाम्मे हुने गरेको उनले बताए । धुलोका कारण स्वास्थ्यमा समेत असर गरेको उनले सुनाए ।