काठमाडौं ÷ राष्ट्रिय प्रजातन्त्र पार्टीको एकता महाधिवेशनमा नेपाली चलचित्रकी चर्चित नायिका रेखा थापा पनि महामन्त्री लड्ने भएकी छन् ।
बुधबारदेखि सुरु भएको महाधिवेशनमा राजेन्द्र लिङ्देन समूहबाट महामन्त्रीको उम्मेदवार बन्न लागेको थापाले बताइन् । उनी नेपाली चलचित्रको नाम चलेकी नायिका हुन् । राजनीतिमा लागेपछि भने चलचित्र क्षेत्रमा मोरङको विराटचोक घर भएकी नायिका थापाको उपस्थिति कमजोर बनेको छ ।

यसैबीच, अध्यक्षका उम्मेदवार कमल थापा र राजेन्द्र लिङ्देनले आ–आफ्नो प्यानल बनाएका छन् । राप्रपा अध्यक्ष कमल थापाले जारी महाधिवेशनबाट पुनः नेतृत्व हत्याउन आफ्नो प्यानल बनाएका हुन् । १९ वर्षदेखि पार्टी अध्यक्ष रहनु भएका थापाले अध्यक्ष पदलाई निरन्तरता दिन पशुपति शमशेर जबरासँग मिलेर टिम बनाएको थापा प्यानलबाट चुनाव लड्न लागेको बताइएको छ । अध्यक्षका अर्का प्रत्यासी राजेन्द्र लिङ्देनसँग चुनावी भिडन्त गर्न थापाले वुद्धिमान तामाङ, विक्रम पाण्डे र ध्रुवबहादुर प्रधान उपाध्यक्ष पदमा चुनाव लडाउने भएका छन् ।

थापा निकट एक नेताकाअनुसार पाण्डे र प्रधान अर्का पार्टी अध्यक्ष जबरा कोटाबाट उपाध्यक्षका उम्मेदवार बन्नु भएको हो । यस्तै महामन्त्रीमा भुवन पाठक, भाष्कर भद्रा र कुन्ती कुमारी शाही उम्मेदवार बन्ने निश्चित भएको छ । शाही प्रत्यक्ष चुनाव लड्ने थापा समूहबाट एकमात्र महिला उमेदवार हुन् । यता अर्का उमेदवार राजेन्द्र लिङ्देनले पनि आफ्नो प्यानल बनाएका छन् । उनको प्यानलबाट उपाध्यक्षमा पार्टीका पूर्व उपाध्यक्ष दिलविकास राजभण्डारी, पूर्वमन्त्री तथा पूर्व उपाध्यक्ष विक्रम पाण्डे र सर्लाहीका नेता रामचन्द्र राय उपाध्यक्ष लड्ने भएका छन् । महिला उपाध्यक्षमा संविधानसभा सदस्य लिला श्रेष्ठ चुनावी मैदानमा उत्रिएकी छन् । यस्तै लिङ्देनको प्यानलबाट महामन्त्रीमा पूर्व महामन्त्री तथा नेपालगञ्ज उपमहानगरपालिकाका मेयर डा. धवल शमशेर राणाले निर्वाचन लड्ने निश्चित भएको छ ।