झापा । भनिन्छ असम्भव केही छैन । यदि कुनैपनि काममा दत्तचित्त भएर लाग्ने हो भने सबै सम्भव छ । यसका उदाहरण हुन झापाको श्रीजी फुड प्रालिका पुर्णिमा उपाध्याय,प्याकुरेल, , स्मीता तिम्सिना, खनाल र शान्ता भट्टराइ, घिमिरे ।
चारआलीमा तीनजनाको समुहले श्रीजी फुड प्रालि मार्फत विभिन्न स्वादका अचार नेपाली बजारमा पुर्याउँदै आएका छन् । नेपालमै उत्पादन भएका उत्पादनलाई प्रयोग उनीहरूले विभिन्न स्वादका अचार बजारमा पुर्याउँदै आएका छन् ।
२०७६ साल मंसिरबाट उनीहरूले अचारको उद्योग सुरु गरेका हुन । अहिले हरेक दिन एक हजार केजीसम्म अचार उत्पादन हुँदै आएको छ । अचार बनाउनका लागि उनीहरूले ईलाम, झापा लगायतका स्थानबाट आवश्यक सामग्री ल्याउने गरेका छन् । यस्तै केही आवश्यक कच्चा पदार्थ भारतबाट समेत आयात गर्दै आएका छन् ।
उनीहरूले उत्पादन गरेको अचार काठमाण्डौं, पोखरा, विराटनगर, धरान, ईटहरी, दमक लगायतका विभिन्न स्थानमा खपत हुँदै आएको छ । यस्तै विदेशमा समेत पुर्याउने योजना रहेको उद्यमी पुर्णिमा उपाध्याय, भण्डारीले बताइन । २०७६ मंसिरबाट अचार उत्पादन सुरु भएपनि उत्पादन सुरु भएको छोटो समयमा नै कोरोना महामारी सुरु भयो । जसका कारण सोचेजस्तो बजार विस्तार गर्न नसकेको उनले बताइन ।
महिलाहरूलाई आयआर्जनमा स्वाभलम्बी बनाउँ भन्ने उद्देश्यका साथ उद्योग संचालन गरेको उपाध्यायले बताइन । उनले भनिन्, ‘घरमा त्यत्तिकै बस्न भन्दा केही गर्नुपर्छ भन्ने सोचाइका साथ उद्योग सुरु गरियो, त्यसमा पनि विशेष गरेर महिलालाई आयआर्जनमा स्वाभलम्बी बनाउनुपर्छ भन्ने उद्देश्यका साथ हामीले उद्योग संचालनमा ल्याएका हौँ ।’
उनको पहिलादेखि नै अचार उद्योग खोल्ने योजना थियो । जसको दौरानमा अन्य दुई जना महिला पनि उनीसँग भेट भए । त्यसपश्चात उनीहरूको उद्यमी बन्ने सपना साकार हुँदै गयो । घरपरिवारले पनि उनीहरूको काम प्रति उर्जा थपिदिँदा थप सहज भएको छ । उद्योगमा अहिले डेढ करोडको लगानी भइसकेको छ ।
महिला उद्यमीलाई सरकारले पनि विभिन्न सुविधा छ भनेपनि अहिलेसम्म सरकारी पक्षबाट भने कुनै सुविधा नपाएको उपाध्यायको भनाइ छ । सरकारी पक्षबाट कुनै अनुदान नपाएपछि आफ्नै जग्गा राखेर बैंक ब्याजमा ऋण लिन परेको उनको भनाइ छ ।
मैले पनि आफ्नै छुट्टै पहिचान बनाउन सक्छु भन्ने योजनाका साथ उद्योग स्थापना गरेको उनले बताइन । उहिलेसम्म ५० जना भन्दा बढी महिलाले उद्योगमा काम गरिसकेका छन् । नियमित रूपमा १० जनालाई रोजगारी दिइरहेको उनले बताइन ।
तामा, टमाटर, अकबरे, कागति लगायतका विभिन्न स्वादका अचार उनीहरूले उत्पादन गर्दै आएका छन् । उद्योग सुरुवाती चरणमा कच्चा पदार्थलाई जसरी लामो समयसम्म नबिग्रने तरीकाले राख्नु पर्ने थियो त्यसरी राख्न नसक्दा नोक्सानी ब्यहोर्न बाध्य भएको उनीहरूको अनुभव छ । तर अहिले त्यसरी नोक्सानी ब्यहोर्नु पर्ने अवस्था नरहेको उपाध्यायको भनाई छ । अहिले फुड टेक्नोलोजिस्ट राखेकाले त्यस्ता समस्या नभएको उनले सुनाइन् ।
अझै विभिन्न स्वादका अचार उत्पादन गरेर देश तथा विदेशका विभिन्न स्थानमा पुर्याउने योजनाका साथ काम भइरहेको उनको भनाइ छ ।श्रीजी फुड प्रालिले अचार उत्पादन मात्र गर्दैन अचार उत्पादका लागि चाहिने कच्चा पदार्थ समेत विक्री गर्दै आइरहेको छ ।
Post Views: 5