विराटनगर।मोरङ कारागारका चौकिदार अभिषेक गिरीले सरुवा रोक्न माग गर्दै हालेको रिट ‘हेर्न नमिल्ने’ भन्दै माघ १२ गतेका लागि पेशी तोकिएको छ । गिरीले उच्च अदालत विराटनगरमा सरुवा रोक्न अन्तरिम आदेशको माग राख्दै माघ ३ गते उच्च अदालत विराटनगरमा रिट निवेदन दर्ता गराएका थिए ।

उनले गृहमन्त्रालयको निर्देशनमा कारागार व्यवस्थापन विभागले गरेको सरुवा गैर कानुनी रहेको भन्दै बदर गर्न मागसहित रिट निवेदन दिएका थिए । उनले कारागार व्यवस्थापन विभाग, जिल्ला प्रशासन कार्यालय र मोरङ कागारालाई विपक्षी बनाएर रिट दर्ता गराएका थिए ।

अदालतका सूचना अधिकारी सुवेदीका अनुसार उच्च अदालत विराटनगरका न्यायाधीश किरणकुमारी गुप्ताको एकल इजलाशले माघ ९ गते सोमबार दुबै पक्षलाई छलफलको लागि उपस्थित हुन आदेश दिएको थियो । तर आजका लागि तोकिएको पेशी ‘हेर्न नमिल्ने’ भनि १२ गतेका लागि पुनः पेशी तोकिएको हो । अदालतले १२ गते छलफलमा आउन दुवै पक्षलाई आदेश गरेको छ ।

मुद्दाको पेशी सोमबार उच्च अदालत विराटनगरका न्यायाधीश राजन प्रसाद भट्टराई र किरणकुमारी गुप्ताको इजलासमा तोकिएको भए पनि ‘हेर्न नमिल्ने’ भएपछि स्थगित भएको उच्च अदालत विराटनगरका सूचना अधिकारी ओमराज सुवेदीले जानकारी दिए । गिरीले एक वर्षभन्दा कम अवधिमा छुट्ने कैदीबन्दीहरूको सरुवा नगर्ने प्राबधान विपरित आफ्नो सरुवा भएकोले बदर गर्न माग गर्दै रिट दिएका थिए । गिरीको फागुन ३ गते कैद अवधि पुरा हँदैछ ।