विराटनगर । मोरङमा एक जना महिलाको हत्या गरिएको छ । हत्या गरेर बोराभित्र पोको पारी फ्यालेको अवस्थामा २८ वर्षीया प्रियंका सुनारको शव फेला परेको हो ।
विराटनगर महानगरपालिका १९ की सुनारको शव मोरङको बूढीगंगा गाउँपालिका २ अमाहीमा सोमबार आज दिउँसो १२ बजेतिर भेटिएको हो ।
मोरङ प्रहरीका प्रवक्ता डीएसपी टीकाबहादुर कार्कीका अनुसार प्लाष्टिकको बोराभित्र पोको पारेर नरसिंह चौधरीको ग्वालीमा फ्यालेको अवस्थामा शव फेला परेपछि घटनाको अनुसन्धान सुरु गरिएको छ ।
‘शरीरका अंगहरूमा चोट रहेको अवस्थामा शव फेला परेको हो, उनले भने, अन्यत्र हत्या गरेपछि बोरामा पोको पारी ल्याएर शव फ्यालेको हाम्रो अनुमान छ ।’
घटनामा संलग्न भएको आशंकामा मोरङको कटहरी गाउँपालिका ५ का ६२ वर्षीय रामानन्द राम र विराटनगर १९ का २९ वर्षीय रमेश साहलाई प्रहरीले पक्राउ गरेको छ ।
घटनामा उनीहरूको संलग्नता यकिन भइनसकेको भएपनि शंका लागेर पक्राउ गरी थप अनुसन्धान अगाडि बढाइएको डीएसपी कार्कीले बताए ।
महिलाको घाटीमा चोट रहेको प्रहरीले जनाएको छ । प्रहरीका अनुसार शव पोस्टमार्टमका लागि कोसी अस्पताल लगिएको छ । घटनाबारे थप अनुसन्धान भइरहेको प्रहरीले जनाएको छ ।
Post Views: 1