विराटनगर । विराटनगर महानगरपालिका वडा नं. ८ ले वडाका जेष्ठ नागरिकको स्वास्थ्य अवस्था बुझ्न घर–घरमा पुग्ने अभियान शुरु गरेको छ । स्वास्थ्यकर्मी सहित वडाका जनप्रतिनिधिहरूले जेष्ठ नागरिकको घर–घरमा पुगेर स्वास्थ्य अवस्था बुझ्ने कार्यको शुरुवात गरेका हुन् ।
विराटनगर महानगरपालिकी उप–प्रमुख शिल्पा निराला कार्कीको उपस्थितिमा अमरटोलकी १०४ वर्षीया नन्दकुमारी पौडेलको घरबाट अभियानको शुभारम्भ भएको हो ।
८० वर्ष भन्दा माथिका जेष्ठ नागरिकलाई लक्षित गरि वडा कार्यालयले औषधी, पौष्टिक आहार, स्वास्थ्य परीक्षण, स्वास्थ्य सामग्री लगायतका सामानहरू घर–घरमा वितरण शुरु गरेको वडाध्यक्ष राम पोखरेलले जानकारी दिए ।
वडा भित्र रहेका ८० वर्ष माथिका जेष्ठ नागरिकको लगत संकलन गरी १३५ जना लक्षित पहिलो चरणको कार्यक्रम शुरु गरिएको उनले बताए । आगामी आर्थिक वर्षदेखि उमेर समूह विस्तारै घटाउँदै लगिने वडाध्यक्ष पोखरेलको भनाई छ । वडा कार्यालयले स्वास्थ्यकर्मीको परामर्शका आधारमा औषधी लगायतका सामग्रीहरू पनि वितरण गरेको छ ।
जेष्ठ नागरिकहरुलाई ग्याष्ट्रिक, रक्तचाप, मधुमेह, दुखाई कम गर्ने औषधी, रक्तचाप, मधुमेहको परीक्षण, हर्लिक्स, झुल, स्टिल लौरो, चार्जेवल लाईट वितरण गरिएको छ ।
कार्यक्रममा वडाध्यक्ष पोखरेल, वडासदस्यहरू ताराकुमारी राय, पवित्रा विक, भुवन राजवंशी, मोहम्वत अब्बास, वडासचिव मनोज मल्लिक, स्वास्थ्य कर्मचारी, स्वास्थ्य स्वयंसेविकाको सहभागिता रहेको थियो ।
अभियान अन्र्तगत आज विराटनगर अमरटोलका १४ जना जेष्ठ नागरिकको घरमा पुगिएको वडासदस्य पवित्रा विकले जानकारी दिएन् । विराटनगर–८ ले जेष्ठ नागरिकको स्वास्थ्यलाई लक्षित गरेर नियमित रूपमा स्वास्थ्य परीक्षण अभियान सञ्चालन गरिरहेको उनको भनाई थियो ।
Post Views: 0