विराटनगर । विराटनगरमा विगत दुई हप्तादेखि बेवारिसे छाप्रोमा बसिरहेकी एक बालिकाको उद्धार गरिएको छ ।
विराटनगर–५, जामुनगाछीमा खेतमा बनाइएको छोडाइएका मकैका घोगा थुपारिएको छाप्रोमा बसिरहेकी सुनसरीको दुहवी नगरपालिकामा पर्ने भुटानीचोक घर बताउने १५ वर्षीया बालिका दुर्गा उरावको आइतबार उद्धार गरिएको हो ।
आफ्नी बहिनीसहित दुई हप्ताअघि घरबाट विराटनगर आएकी दुर्गाले आफू कामको खोजीमा विराटनगर आएको बताइन् । विराटनगरमा आफन्त कोही नरहेको र बस्ने ठाउँ नभएकोले दुई हप्तासम्म दिदीबहिनी सोही छाप्रोमा बसेको उनले बताइन् ।
यसबीच कामको खोजीमा हिँडिरेहका दिदीबहिनीलाई जामुनगाछीकी स्थानीय कुन्ती कामतले एक हप्ताअघि जनही प्रतिदिन ६ घण्टाको चार सय रूपैयाँका दरले पारिश्रमिक पाउने गरी खेतमा पाकेको मकै भाँच्ने काम दिइन् । उनीहरूले दुई दिन काम गरेर सहमतिअनुसारको पारिश्रमिक लिए ।
पारिश्रमिकबापत पाएको रकमले केही दिन भोकप्यास टार्दै कामको खोजी जारी राखेर उनीहरू त्यही छाप्रोमा बसे । हत्तपत्त कसैको नजर नजाने छाप्रोमा बसेका उनीहरूबारे स्थानीयले ढिलो गरी मात्र थाहा पाए । स्थानीयले सोधपुछ गर्दा उनीहरूले आफूहरू घर जाने बताए ।
तर, पारिश्रमिकबापतको रकमबाट बचेको रकमले दुवैलाई घर जाने खर्च नपुगेपछि दुर्गाले आफ्नी बहिनीलाई शनिबार घर पठाएर आफू छाप्रोमै बसिन् र कामको खोजी जारी राखिन् । पछिल्ला तीन–चार दिन आफूले खानेकुरा नखाएको दुर्गाले सुनाइन् । आइतबार उद्धारका लागि छाप्रो पुगेका जामुनगाछीका स्थानीयले उनलाई खाजाको व्यवस्था गरिदिए ।
यसरी दुई हप्तासम्म बेवारिसे छाप्रोमा बसेकी दुर्गाको आइतबार स्थानीयको रोहवरमा उद्धार गरेर प्रहरीको जिम्मा लगाइएको छ । प्रहरीले उनलाई परिवारसँग सम्पर्क गरेर घर पठाउने प्रक्रिया सुरू गरेको छ ।
उद्धार गरिएकी दुर्गाका अनुसार उनले विराटनगरको तीनपैनी चोकमा स्थानीय शेरसिंह दुगडको घरमा तीन वर्ष दुगडका शिशु स्याहारको काम गरेकी थिइन् । तर, उनले पाउनुपर्ने पारिश्रमिकबापतको रकम उनकी कान्छीआमा रामवती उरावले लिइन् । दुर्गाकी आफ्नी आमा दीपा उरावले केही वर्षअघि परिवार छाडेर हिँडेपछि बुवा प्रदीप उरावले रामवतीलाई दोस्री श्रीमतीको रूपमा विवाह गरेका हुन् ।
आफ्नो समस्यामा केही स्थानीयको आशंकायुक्त केरकारले सशंकित बनेकी दुर्गालाई बालउमेरमै श्रम गर्दै हिँड्नु र यसरी बेवारिसे छाप्रोमा भोकप्याससहितका समस्या झेल्दै बस्नुको कारणबारे सोध्दा उनले स्पष्ट बताइनन् ।
Post Views: 451