विराटनगर । विराटनगर ९ स्थित इडेनवर्ग कलेजले स्नातक तह प्रथम वर्षमा नयाँ भर्ना भएका विद्यार्थीहरूलाई स्वागत र चौथो वर्षको अध्ययन पूरा गरेका विद्यार्थीहरूलाई बिदाइ गरेको छ ।

कलेजले बिहीबार विराटनगरस्थित होटल मनास्लु इनमा एक कार्यक्रम आयोजना गरी स्नातक तह प्रथम वर्षमा बीबीएस र बीएड अध्ययनका लागि नवआगन्तुक ४१५ जना विद्यार्थीहरूलाई स्वागत गरेको हो । यस्तै यिनै संकायमा चौथो वर्षको अध्ययन सकेर वार्षिक परीक्षाको अन्तिम तयारीमा रहेका २५० जना विद्यार्थीहरूलाई बिदाइ गरेको हो गरिएको कलेजका क्याम्पस प्रमुख डीके साहले जानकारी दिए ।

स्वागत तथा बिदाइ कार्यक्रम कलेजका अध्यक्ष विष्णु दाहालको अध्यक्षता तथा त्रिभुवन विश्वविद्यालय क्षेत्रीय परीक्षा नियन्त्रण कार्यालय, विराटनगरका सहनियन्त्रक डा। डिल्लीराम प्रसाईंको प्रमुख आतिथ्यतामा सम्पन्न भएको थियो ।

कार्यक्रमलाई सम्बोधन गर्दै कलेजका अध्यक्ष दाहाल, प्रमुख अतिथि डा। प्रसाईं, क्याम्पस प्रमुख डीके साह, कान्तिपुर कलेजका निर्देशक प्रा। डा। जनक अधिकारी, कान्तिपुर कलेजका प्रिन्सिपलसमेत रहेका इडेनवर्ग कलेजका सञ्चालक भुवन नेपाललगायतले विद्यार्थीहरूको उज्ज्वल शैक्षिक भविष्यका लागि शुभकामना दिएका थिए ।

कार्यक्रमका अवसरमा स्नातक तह अध्ययनरत दुई जना विद्यार्थीहरूलाई पूर्ण छात्रवृत्ति प्रदान गरिएको छ । इडेनवर्ग कलेजका पूर्वकर्मचारी स्व. कृष्ण देवानको स्मृतिमा स्थापित पूर्ण छात्रवृत्तिसहितको पुरस्कार बीबीएस तेस्रो वर्षमा अध्ययनरत सृजनाकुमारी मेहताले पाएकी छन् । त्यसैगरी कलेजले बीबीएस दोस्रो वर्षमा अध्ययनरत आरिफ अंसारीलाई पूर्ण छात्रवृत्ति प्रदान गरेको हो ।

कार्यक्रममा विद्यार्थीहरूले नृत्य प्रस्तुत गरेका थिए । सो अवसरमा इन्जिनियर एशोसिएशन कोशी प्रदेश प्रमुख तथा कलेजका सञ्चालक जयनाथ यादवसहित विभिन्न शैक्षिक संस्थाका प्रिन्सिपलहरूको उपस्थिति रहेको थियो ।