काठमाडौं । नक्सालस्थित प्रहरी प्रधान कार्यालयमा ऐतिहासिक चलचित्र ‘नालापानी’को भव्य प्रदर्शन भएको छ ।

मंगलबार प्रहरी उच्च पदस्थ कर्मचारीहरूसहित सक्कल दर्जाका प्रहरी कर्मचारी, प्रहरी स्कुल र सामुदायिक स्कुलका प्राध्यापक, प्राचार्याहरूको बीचमा प्रहरी प्रधान कार्यालयमा ऐतिहासिक चलचित्र ‘नालापानी’को भव्य प्रदर्शन भएको हो ।

लेखक, निर्माता तथा निर्देशक रिमेश अधिकारी तथा प्राविधिक संघका अध्यक्ष पुष्कर लामासमेत चलचित्र प्रदर्शनमा उपस्थित भएका थिए ।

चलचित्र हेरेपछि पूर्व एआइजी, डिआइजी र अफिसरहरूले उत्कृष्ट चलचित्र बनेको प्रतिकृया दिएका थिए ।

उपस्थित सबैले चलचित्रले राष्ट्रिय गौरव र वीरगाथा बोकेको नेपाल निर्माणको लागि नालापानीको युद्धको भूमिका उच्च रहेको कुरा चलचित्रले वास्तविक रूपमा चित्रण गरेको बताए ।

सम्पूर्ण नेपालीले एकपटक चलचित्र हेर्र्नैपर्ने प्रतिकृया दिँदै, विद्यार्थी वर्ग, इतिहास अध्येता, कला, संस्कृतिका अध्येताको लागि यस चलचित्र एउटा अध्ययनको सन्दर्भ सामग्री रहेको बताउँदै चलचित्र निर्माता निर्देशकलाई सफलताको शुभकामना दिँदै भविष्यमा पनि यस्ता चलचित्रको निर्माणका लागि हौसला तथा प्रेरणा पनि प्रदान गरेका थिए ।

निर्माता तथा निर्देशक रिमेश अधिकारी फेरि ऐतिहासिक चलचित्र ‘कोतपर्व’को निर्माणमा जुटिसकेका छन् । आउँदो चैत्र महिनाबाट ‘कोतपर्व’को छायांकनको तयारी थालेका अधिकारीले कलाकार सौगात मल्ल, बेनिशा हमाल, रमेश उप्रेतीलाई अनुबन्धित गरिसकेका छन् ।

अन्य कलाकारलाई पनि चाँडै अनुबन्धित गरिने अधिकारीले बताए । हाल ‘कोतपर्व’ धमाधम प्रि–प्रोडक्सनको काम भैरहेको छ ।