महेश भट्टराई

इटहरी । समाजवादी विद्यार्थी युनियन प्रदेश एकको समायोजन सम्पन्न भएको छ । आइतबार जनता समाजवादी पार्टी प्रदेश कार्यलयको सभाहल इटहरीमा आयोजित समायोजन तथा घोषणा कार्यक्रमबाट रविन खम्बुको नेतृत्वमा ६१ सदस्यीय समिति गठन गरिएको हो ।

नवनिर्वाचित समितिको वरिष्ठ उपाध्यक्षमा अरविन्द्र मण्डल, उपाध्यक्षमा वरदान भरत राई, पनन राई, मिलन कोयी राई, चन्द्र किराती, प्रज्ञा इजम लिम्बु, डि एन सुब्बा र मिथलेस यादव चयन भएका छन् ।

त्यस्तै मुख्य सचीव कृष्ण गिरि, सचीवमा मनोज यादव, परमेश्वर यादव, सुबास राई र योगेन्द्र राई चयन भएका छन् भने कोषाध्यक्षमा फुलन मण्डल चयन भएका हुन् ।

जनता समाजवादी पार्टी प्रदेश एक सदस्य शिल्पा राईको प्रमुख आतिथ्यतामा उक्त समायोजन सम्पन्न गरिएको नवनिर्वाचित समितिका उपाध्यक्ष चन्द्र किरातीले जानकारी दिए ।

प्रदेश १ को समाजवादी विद्यार्थी युनियनको अध्यक्ष भएपछि जुझारु छवि भएका नेता खम्बूले प्रदेश १ मा समाजवादी विद्यार्थी युनियनलाई विस्तार गर्नु नै आफ्नो प्राथमिकता भएको बताए ।

नवनिर्वाचित समितिको पहिलो बैठक आगामी पुष ६ र ७ गते खोटाङमा गर्ने तथा समिति गठन गर्न बाकी जिल्ला, क्याम्पसमा तत्काल समिति विस्तार गर्ने निर्णय समेत गरिएको नवनिर्वाचित अध्यक्ष रविन खम्बुले बताए ।

उनले कतिपय जिल्लामा संगठन नै नबनेको भन्दै संगठन नबनेका जिल्लामा संगठन बनाउने, क्याम्पसहरुमा संगठन बनाउने, निष्कृय रहेका संगठनहरुलाई सक्रिय बनाउने र प्रदेश १ मा समाजवादी विद्यार्थी युनियनलाई एउटा शक्तिशाली विद्यार्थी संगठन बनाउने बताए ।

समाजवादी विद्यार्थी युनियन सुनसरी अध्यक्ष मिथलेस यादवको अध्यक्षता सम्पन्न समायोजन कार्यक्रममा विशेष्ट अतिथी समाजवादी विद्यार्थी युनियन केन्द्रीय उपमहासचिव प्रकाश चाम्लिङ, अतिथिहरुमा समाजवादी विद्यार्थी केन्द्रीय सचीव मनिष यादव, समाजवादी विद्यार्थी युनियनका ३२ जना सदस्यहरु लगायतको उपस्थिति रहेको थियो ।

समाजवादी विद्यार्थी युनियन जनता समाजवादी पार्टीको भातृ संगठन हो ।
पूर्व समाजवादी विद्यार्थी फोरम र नयाँ शक्ति विद्यार्थी युनियनबिच एकता भइ समाजवादी विद्यार्थी युनियन घोषणा गरिएको थियो । केन्द्रमा एकता भए सँगै लामो समय पश्चात् आइतबार प्रदेश एकको समेत समायोजन सम्पन्न गरिएको हो ।