बिराटनगर, ५ चैत । प्रदेश प्रहरी कार्यालय विराटनगरकाले चालु आर्थिक बर्षको ८ महिनाको अवधिमा ४ हजार ६ सय ८९ मुद्धा दर्ता गरेको छ । यस्तै उक्त अबधिमा २७ करोड भन्दा बढी राजश्व संकलन गरेको जनाएको छ ।

चालु आर्थिक बर्षको ८ महिनामा मात्र ४ हजार ६ सय ८९ वटा बिभिन्न अपराध सम्बन्धी मुद्धा दर्ता भएका थिए । दर्ता भएका मुद्धा कारवाही गरिसकिएको कार्यालयले जनाएको छ ।

फैसला कार्यान्वयन तर्फ बिभिन्न अपराधमा सजाय तथा जरिवाना फैसला भई फरार ५ सय ३९ जना फरार प्रतिवादी पक्राउ गरेको जनाइएको छ । जसबाट २ करोड ३ लाख ४२ हजार ७ सय ४४ रुपैयाँ राजश्व संकलन भएको छ ।

यसैगरी लागुऔषध नियन्त्रण गर्न चलाएको अभियानबाट १ हजार ६ सय ५१.६८१ ग्राम ब्राउनसुगर, १ हजार १ सय ३१.७९० केजी गाँजा बरामद भएको छ । यसैगरी बिभिन्न मनोद्धिपक क्याप्सुल ३४ हजार ९ सय ५९ ट्याब्लेट बरामद भएको तथा मनोद्धिपक सुई ५ हजार ३ सय ५ एम्पुल बरामद भएको छ । अन्य बिभिन्न किसिमका मनोद्धिपक औषधीहरु १ हजार ८ सय ६४ ट्याब्लेट बरामद भएको छ ।

यसैगरी २ हजार ४ सय २३ रोपनीमा लगाएको गाँजा खेती फडानी गरी ८ लाख ७६ हजार ५ सय ४१ गाँजाका बोट नष्ट गरिएको छ । यसैगरी भन्सार चोरी निकाशी तर्फ अबैध रुपमा समान चोरी निकाशी गर्ने १ सय ४२ जना मानिस पक्राउ गर्नुका साथै १३ करोड १८ लाख ६ हजार ८ सय ६ रुपैयाँ राजश्व संकलन भएको छ । यस्तै नदिजन्य पदार्थको अबैध रुपमा दोहन गर्ने १ सय ४० जना मानिस र ५ सय ९८ वटा नदिजन्य पदार्थ उत्खनन गर्ने र ओसार पसार गर्ने सवारी साधनलाई पक्राउ गरिएको छ । जसबाट ४५ लाख ६६ हजार ७ सय २० राजश्व संकलन भएको कार्यालयले जनाएको छ ।

यसैगरी अबैध काठ चोरी निकासी गर्ने ४१ जना पक्राउ गर्नुका साथै २ हजार ३७ क्यू.फिट. काठ बरामद गरेको कार्यालयले जनाएको छ । जसबाट ३० लाख ९५ हजार २ सय रुपैयाँ राजश्व संकलन भएको बताइएको छ । यसैगरी ट्राफिक ब्यबस्थापन तर्फ नियम उलंघन गर्ने १ लाख ७९ हजार ३ सय ४९ वटा सवारी साधनलाई कारवाही गरिएको प्रदेश प्रहरी कार्यालय विराटनगरले जनाएको छ । जसबापत ११ करोड १७ लाख २६ हजार राजश्व संकलन भएको छ ।

चालु आर्थिक बर्षको ८ महिनामा प्रदेश भरबाट २७ करोड १५ लाख ३७ हजार ४ सय ७० राजश्व संकलन भएको प्रदेश प्रहरी कार्यालयले जनाएको छ ।