धरान, २ बैशाख । गर्मीयाम सुरु भए पछि बि.पि. कोइराला स्वास्थ विज्ञान प्रतिष्ठानको लायन्स क्लब अफ धरान घोपा युनाइटेडले शुक्रवारदेखि ‘बन्धनः द क्लोथ बैंक’ सेवा सुरु गरेको छ । यस अन्तर्गत पहिलो दिन राती ११ बजेदेखि ३ बजेसम्म भानु चोक, बगरकोट, बरगाछी र व्यु पोइन्ट स्थित सडक मानवहरु सुत्ने ठाउँ पुगेर लायन्स क्लब अफ धरान घोपा युनाइटेडका लायन्सहरुले सडक मानव र उनीहरुका परिवारका अरु सदस्यहरुलाई लुगा बितरण गरेका छन् ।

दिनभरी मागेर जीविकोपार्जन गर्ने र राती सडकमा सुत्ने थुप्रै मानिसहरु अर्धनग्न अवस्थामा रहेको जानकारी पाए पछि आफुहरुले ५ दिनदेखि लुगा संकलन, सफा, प्रसोधन र प्याकेजिङ्ग गरेको र नयाँ बर्ष मनाउन राखेको खर्च तथा बि.पि. मा बस्ने विद्यार्थीहरु र परिवारहरुको सहयोगले सडक मानव र उनीहरुका परिवारका अरु सदस्यहरुकालागि उनीहरु बस्ने ठाँउमै पुगेर लुगा बाँड्ने प्रयास सुरु गरेको प्रतिष्ठानमा कार्यरत इन्टर्न तथा लायन्स क्लब अफ धरान घोपा युनाइटेडका अध्यक्ष लायन डा. शुभम कुमार अग्रवालले बताए । नयाँ बर्ष मनाउने नाममा तडकभडक गर्नु भन्दा दुःखीहरुको हेरचाहमा थोरै भए पनि सहयोग पुगोस् भनेर सहयोग गरिएको क्लबका सचिव लायन अभिजित कुमार सिंहले बताए । यसका साथै आउने दिनहरुमा अरु ठाउँहरुमा पनि ‘लायन्स क्लोथ बैंक’ को सेवा अभियानलाई निरन्तरता दिने कार्यक्रमका संयोजक लायन मधुसूदन माधवले बताए ।

बितरणको क्रममा सो क्षेत्रको बिषयमा जानकारी ल्याएर आफुहरुलाई सहयोगको लागि घच्घच्याउने लायन डा. प्रभात कापडी, लायन देवान्शु राज श्रीवास्तव, लायन भितास्ता मुस्कान र लियो दिपा चौधरीलाई बिशेष धन्यवाद दिइएको थियो । सो क्षेत्रका सडक मानवहरुको अवस्थाको बिषय सार्वजनिक भएपछि जीवनयापनमा सहजता प्रदान गर्न एवं दुखमा साथ दिन कपडा बितरण गरिएको सो कार्यक्रममा उपस्थित डा. कापडीले बताए ।

गर्मीयाम सुरुवातदेखि नै लुगा नभएर अर्धनग्न अवस्थामा बस्न बाध्य भएका सडक मानवहरु राम्रो कपडा पाए पछि निकै हर्सित देखिन्थे । लत्ता कपडा पाएपछि सडकमा बस्दै गरेका रमनले भने, ‘हामी जस्तो दुःखीलाई पनि हेर्ने मनकारी हुँदा रहेछन् । राम्रो कपडा पाउँदा धेरै सहयोग मिलेको छ ।’

प्रतिष्ठानमा अध्ययन गर्दै गरेका विद्यार्थीहरुले सन् २०२० मा स्थापना गरेको लायन्स क्लब अफ धरान घोपा युनाइटेडले स्थापना कालदेखि नै समाजप्रति उत्तरदायि हुदै ‘आरोग्यः मुभ फर हेल्थ’ अन्तर्गत दुर्गम ठाउँहरुमा र विपन्नकालागी निःशुल्क स्वास्थ जाँच शिविरहरु, ‘अन्नपूर्णः ह्यपी बेल्ली, ह्यापी फेसेस’ अन्तर्गत टोल विकास संस्थासङ समन्वय गरि गरिबहरुलाई खाद्यान्न बाड्ने, ‘बन्धनः द क्लोथ बैंक’ अन्तर्गत विपन्नलाई जाडो र गर्मीका लुगाहरु वितरण, ‘दिर्घजिवीः लिव्स लाइफ, गिव्स लाइफ’ अन्तर्गत ‘ब्लड अन कल’ कार्यक्रम, ‘नवजिवनः होलिस्टिक रेज्युभिनेसन इन द हिलिङ स्पेस’ अन्तर्गत विपन्नको सम्पुर्ण उपचार, ‘निकेतनः वेयर डृम्स कम होम’ अन्तर्गत विपन्न र अपांगकालागी घर निर्माण, ‘निर्मलः आवर सिटि, क्लिन सिटि’ अन्तर्गत सरसफाइ कार्यक्रम, ‘प्याड बैंकः फर पिरियड्स विथ नो वरिज’ अन्तर्गत ग्रामिण र विपन्न महिलाहरुलाई निःशुल्क स्यानिटेरी प्याड वितरण, ‘सन्जिवनीः सेयरिङ मेडिसिन्स, स्प्रेडिङ स्माइल्स’ अन्तर्गत विपन्नकालागी मेडिसिन बैंक, विद्यालयहरुमा ‘सुस्वाथ्यः इन्सपाइरिङ बेटर हेल्थ’ अन्तर्गत स्वास्थ्य सम्बन्धी चेतनामुलक कार्यक्रमहरु, तथा अन्य विविध शिक्षा र स्वास्थसँग सम्बन्धित कार्यक्रमहरु आयोजना गर्दै आएको छ ।