विराटनगर, १८ बैशाख । मोरङको सुन्दरहरैंचा नगरपालिका ९ स्थितमा ‘स्वाभिमान नेपाल’ संस्थाको उद्घाटन भएको छ । संस्थाको उद्घाटनको क्रममा जेष्ठ नागरिकहरूलाई सम्मान गर्दै बिहीबारबाट ७ दिने महिला उद्यमशीलता तालिम समेत सुरु गरेको छ । सात दिने महिला उद्यमशील तालिम अन्तर्गत बेहुली जुत्ता बनाउने तालिमको प्रशिक्षण मालती आचार्यले दिने छिन ।

कार्यक्रममा ८० बर्ष भन्दा माथिका जेष्ठ नागरिक तिलक बहादुर बुढाथोकी, तीर्थराज पराजुली, दिल कुमारी तामाङ, यसोदा कुमारी धमला, पवित्रा दाहाल, पुष्पराज घिमिरे दोसल्ला ओढाएर सम्मान गरिएको थियो । संस्थाकी अध्यक्ष गोमा खड्का कोंग्रेनको अध्यक्षतामा भएको कार्यक्रममा सुन्दरहरैंचा नगरपालिकाका नगरप्रमुख शिव प्रसाद ढकाल प्रमुख आतिथि रहेका थिए भने समाजसेवी ललित बहादुर श्रेष्ठ विशिष्ठ आतिथि रहेको थिए ।

कार्यक्रममा बोल्दै प्रमुख अतिथि ढकालले स्वाभिमान नेपालले प्रशंसनीय कार्य गरेको बताए । उनले यस संस्थाले समाजमा भइरहेका विकृति विसंगतिका विरुद्ध सचेतना अभियान चलाएको बताए । संस्थाले पिछडा वर्गका महिलाहरुलाई उद्यमशीलता तालिम दिएर उद्यमी बनाउने छ भन्ने विश्वास लिएको ढकालले बताए । यसकार्यको लागि नगरको तर्फबाट सकेको सहयोग गर्न समेत ढकालले बताए । कार्यक्रममा बोल्दै ढकालले आफ्नो कार्यकालमा वृद्धा आश्रम खोल्न नदिने समेत बताए ।

कार्यक्रममा संस्थाकी उपाध्यक्ष सृजना खड्का, समाजसेवी तथा महिला अभियन्ता अनिता ज्ञवाली, निरु बजगाईं, मनु तामाङ, देवी माया ढकाल, तारा बस्नेत, राम पसाद्र गजुरेल, साजन मिया लगायतले शुभकामना व्यक्त गरेका थिए । कार्यक्रम संस्थाका सचिव देवचन्द्र घिमिरेले सञ्चालन गरेका थिए । कार्यक्रममा नगरभरिका १५० भन्दा बढीको सहभागीता रहेको थियो । उक्त कार्यक्रम कोरोना महामारीलाई ध्यानमा राखेर सरकारले जारी गरेको स्वास्थ्य मापदण्ड अपनाएर गरिएको घिमिरेले बताए ।

तालीमको दोश्रो दिन ४० भन्दा बढी महिलाले मखमल जुत्ति बनाउने तालिम लिएका छन् ।