विराटनगर, १३ चैत । प्रदेश १ का मुख्यमन्त्री शेरधन राईले मन्त्रिपरिषद् विस्तार गरेका छन् ।

मुख्यमन्त्री राईले शुक्रबार मन्त्रिपरिषदमा मन्त्रीहरुको जिम्मेवारी हेरफेर तथा विस्तार गरेका हुन् ।

विस्तारसँगै प्रदेश १ को मन्त्रिपरिषद नौँ सदस्यीय बनेको छ । केही मन्त्रीहरुको जिम्मेवारी हेरफेर र केही नयाँ विस्तार गर्दै मुख्यमन्त्री राईले ताप्लेजुङ्गका टंक आङ्बुहाङ्ग लिम्बुलाई आर्थिक मामिला तथा योजना मन्त्री, इलामका रामबहादुर मगरलाई भूमि व्यवस्था, कृषि तथा सहकारी मन्त्री, खोटाङकी उषाकला राईलाई सामाजिक विकास मन्त्री, ओखलढुंगाका अम्बिरबाबु गुरुङलाई भौतिक पूर्वाधार विकास मन्त्री नियुक्त गरे ।

यसैगरी मोरङका राजकुमार ओझालाई उद्योग पर्यटन, वन तथा वातावरण राज्यमन्त्री र उदयपुरकी कला घलेलाई भूमि व्यवस्था कृषि तथा सहकारी राजयमन्त्री नियुक्त गरेका हुन् ।

नवनियुक्त मन्त्रीहरुलाई शुक्रबार प्रदेश प्रमुखको कार्यालयमा आयोजित समारोहमा शपथ गराइएको छ । मन्त्रीहरुलाई प्रदेश प्रमुख सोमनाथ अधिकारी प्यासीले र राज्यमन्त्रीहरुलाई मुख्यमन्त्री शेरधन राईले शपथ गराए ।

मुख्यमन्त्री राईले भौतिक पूर्वाधार विकास राज्यमन्त्री अम्बिरबाबु गुरुङको पदोन्नति गर्दै मन्त्री नियुक्त गरेका हुन् भने भूमि व्यवस्था, कृषि तथा सहकारी राज्यमन्त्री रामबहादुर मगरलाई पनि पदोन्नति गरी सोही मन्त्रालयको मन्त्रीको जिम्मेवारी दिएका हुन् ।

मुख्यमन्त्री राईले मन्त्रिपरिषदमा नेकपा माओवादी केन्द्र परित्याग गरी एमाले प्रवेश गरेका टंक आङ्बुहाङ्गलाई यसअघि माओवादी केन्द्रकै नेता इन्द्रबहादुर आङ्बोले सम्हालेको मन्त्रालयको जिम्मा दिए ।

यस्तै नेकपा एमालेको माधवकुमार नेपाल समूह परित्या गरी अध्यक्ष केपी शर्मा ओलीलाई सहयोग गरेकी उषाकला राई सामाजिक विकास मन्त्रीको जिम्मेवारी दिए ।

यसैगरी यसअघि मुख्यमन्त्री विरुद्ध अविश्वासको प्रस्तावमा हस्ताक्षर गरी पछि फिर्ता लिएकी कला घले र माधव नेपाल समूह छोडेर मुख्यमन्त्रीको साथ दिएका राजकुमार ओझालाई उनले राज्यमन्त्रीको रुपमा नियुक्त गरे ।

नवनियुक्त मन्त्रीहरुले शुक्रबार नै आ–आफ्नो मन्त्रालयमा पदभार ग्रहण गरेका छन् । प्रदेशको यातायात व्यवस्था सम्बन्धी एउटा कार्यक्रमिक फाइल सदर गर्दै आर्थिक मामिला तथा योजनामन्त्री टंक आङ्बुहाङ्ले पदभार ग्रहण गरे ।

मन्त्री टंक आङ्बुहाङ्ले प्रदेशको आर्थिक धरातलमा टेकेर बजेट निर्माण गर्ने तथा यस अघि भएका कमीकमजोरी सच्याउँदै अघि बढ्ने बताए ।

उनले मन्त्रालयहरुबीच समन्वय गरी दातृ निकायहरुसँग सहयोग जुटाउँदै सरकारले आफ्ना योजनाहरु अगाडि बढाउने प्रतिकृया दिए ।