विराटनगर । जीवन विकास लघुवित्त वित्तीय संस्थाको अमरदह शाखाले केन्द्र प्रमुख गोष्ठी तथा वित्तीय साक्षरता कार्यक्रम गरेको छ । संस्थाले शनिवार अमरदहमा कार्यक्रम सम्पन्न गरेको हो ।

संस्थाका विभागीय प्रमुख विजयकुमार मण्डलको सभापतित्वमा भएको कार्यक्रमको उद्घाटन सत्रमा मोरङ क्षेत्र नं. २ का प्रतिनिधिसभा सदस्य ऋषिकेश पोखरेल प्रमुख अतिथिका रूपमा उपस्थित थिए ।

कार्यक्रममा बोल्दै सांसद पोखरेलले लघुवित्तको पैसा ग्रामीण भेगका विपन्न महिलाहरूको भएको र लघुवित्तविरूद्ध लाग्नेहरूलाई सरकारले कारबाही गर्नुपर्ने बताएका थिए । कार्यक्रममा संस्थाको अमरदह शाखाकी प्रमुख विद्या देवकोटाले स्वागत मन्तव्य राखेकी थिइन् । उद्घाटन सत्रपछि वित्तीय साक्षरता कार्यक्रम भएको थियो । कार्यक्रममा सहभागीहरूलाई संस्थाका विभागीय प्रमुख मनोजकुमार साहले सहजीकरण गरेका थिए ।

त्यसपछि अन्तर्क्रिया कार्यक्रम भयो, जुन संस्थाका मोरङ जिल्ला प्रमुख सन्तोष कार्कीले सञ्चालन गरेका थिए । अन्तर्क्रियामा सहभागीहरूले उठाएका प्रश्न तथा जिज्ञासाको सम्बोधन संस्थाका अर्का विभागीय प्रमुख विजयकुमार मण्डलले गरेका थिए ।

कार्यक्रमका अवसरमा संस्थाले गत आर्थिक वर्ष २०७९/०८० मा विभिन्न ४ विधामा उत्कृष्ट हुने ५ वटा केन्द्र र ९ जना सदस्यलाई पुरस्कृत गरेको थियो । पुरस्कृत हुनेमा ५ वटा उत्कृष्ट केन्द्रसहित ३ जना उत्कष्ट उद्यमी सदस्य, ३ जना उत्कृष्ट बचतकर्ता सदस्य र ३ जना उत्कृष्ट ऋणी सदस्य रहेका थिए ।

साथै संस्थाले स्थानीय अतिविपन्न ५ परिवारका १० जना विद्यार्थीहरूलाई वर्षभरि निःशुल्क अध्ययनको व्यवस्थासहित छात्रवृत्ति पनि प्रदान गरेको थियो । कार्यक्रममा सुनवर्षी नगरपालिकाका नगर प्रमुख श्यामप्रसाद राजवंशी, उपप्रमुख मिरादेवी दास र पथरी शनिश्चरे नगरपालिकाकी उपप्रमुख देवीमाया काफ्ले विशिष्ट अतिथिका रूपमा उपस्थित रहेका थिए ।

यस्तै सुनवर्षी नगरपालिका वडा नं. २ का अध्यक्ष विनोदकुमार राजवंशी, रंगेली नगरपालिका वडा नं. ९ का अध्यक्ष चूडामणि रेग्मी, रत्न आधारभूत विद्यालयका प्रधानाध्यापक कृष्णबहादुर कार्की, सरस्वती आधारभूत विद्यालयका प्रधानाध्यापक खगेश्वर भट्टराई तथा संस्थाका सदस्यहरूको तर्फबाट कविता राजवंशी र राजश्री ढुंगेल अतिथिका रूपमा उपस्थित रहेका थिए ।