विराटनगर । होली खेलेर सुनकोशीमा नुहाउने क्रममा तीन दिनअघि बेपत्ता भएकी उदयपुरको त्रियुगा नगरपालिका-१४, साउनेकी रेखा मगरको शव फेला परेको छ । बुधबार बिहान उनको शव फेला परेको हो ।

जिल्ला प्रहरी कार्यालय, उदयपुरका अनुसार आज बिहान साउनेको धाप्लाङदेखि ६ किलोमिटर तल सूर्यढुङ्गा भन्ने स्थानमा १२ वर्षीया रेखाको शव फेला परेको हो ।

स्थानीय माछा मार्नेहरूले बेलुकी कोशीमा जाल थापेका थिए । बिहान जाल हेर्न जाँदा मृतक मगरको शव पानीमा देखेपछि प्रहरीलाई खबर गरेका थिए । रेखाको शव परीक्षणका लागि जिल्ला अस्पताल लैजाने तयारी भइरहेको उदयपुरका प्रहरी प्रमुख रमेश थापाले बताए ।

मङ्गलबार मात्र बेपत्ता तीन बालबालिकामध्ये ८ वर्षीय रिदम मगरको शव पनि घटनास्थलदेखि एक हजार चार सय मिटर तल घिर्लिङ भन्ने स्थानमा फेला परेको थियो ।

तीन दिनअघि त्रिनपा-१४, साउनेका १२ वर्षीया रेखा मगर, १० वर्षीय लोकबहादुर मगर र ८ वर्षीय रिदम मगर होली खेलेर सुनकोशीमा नुहाउन जाँदा बेपत्ता भएका थिए । बेपत्ता रहेका लोकत्रबहादुरको प्रहरी र स्थानीयसहित सुनसरीको इटहरीबाट गएको सशस्त्र प्रहरीको गोताखोर टोलीले खोजी जारी राखेका छन् ।