विराटनगर । विराट गोल्डकप फुटबल प्रतियोगिताको आठौं संस्करण बिहीबारदेखि सुरू हुँदै छ । प्रतियोगिताका लागि आवश्यक सबै तयारी पूरा भएको आयोजक विराट गोल्डकप फुटबल ट्रष्टले जनाएको छ ।
विगत वर्षहरूमा ट्रष्टले संयोजक राखेर गर्दै आएको प्रतियोगिता यस वर्ष ट्रष्टको कार्यसमिति आफैंले गर्न लागेको हो । प्रतियोगिताको पूर्वसन्ध्यामा बुधबार पत्रकार सम्मेलन गरेर खेल हुने शहीद रंगशालाकाे मैदान मर्मत तथा सरसफाइ, खेलाडीहरूलाई खेल मैदानमा प्राथमिक उपचारको व्यवस्थासहितका तयारी भइसकेको ट्रष्टका अध्यक्ष किशोरबहादुर शाहीले जानकारी दिए ।
प्रतियोगितामा नेपाल, भारत र भुटानका गरी १० टोली सहभागी हुँदै छन् । नेपालबाट विभागीयसहित ७, भारतबाट २ र भुटानबाट १ टोलीको सहभागिता रहने छ ।
प्रतियोगितामा सहभागी हुने टोलीलाई दुई समूहमा विभाजन गरिएको छ । समूह ‘ए’ मा घरेलु टोली सांग्रिला मोरङ एफए, भुटानको रोयल थिम्पु एफसी, नेपाल पुलिस क्लब, सशस्त्र प्रहरी बलको एएपीएफसी र चर्च ब्वाइज युनाइटेड छन् ।
यस्तै समूह ‘बी’ मा भारतको सिक्किम ड्रागन्स, साउर्थन समिति कोलकाता, त्रिभुवन आर्मी फुटबल क्लब, न्युरोड टिम (एनआरटी), मच्छिन्द्र फुटबल क्लब छन् ।
प्रतियोगिताको उद्घाटन खेलमा बिहीबार विभागीय टोली नेपाल पुलिस क्लब र भुटानको रोयल थिम्पु एफसीबीच प्रतिस्पर्धा हुने भएको छ । बेलुका पौने ६ बजे सुरू हुने खेल कोशी प्रदेशका मुख्यमन्त्री केदार कार्कीले उद्घाटन गर्ने तय भएको छ ।
प्रतियोगिताको फाइनल खेल चैत २४ गते हुने छ । विजेता टोलीले नगद ११ लाख रूपैयाँ र उपविजेता टोलीले नगद ५ लाख ५० हजार रूपैयाँ पाउने छन् ।
त्यसैगरी उत्कृष्ट प्रशिक्षकलाई नगद २१ हजार रूपैयाँ, उत्कृष्ट गोलरक्षक र सर्वाधिक गोलकर्तालाई जनही नगद २१ हजार रूपैयाँ पुरस्कार दिइने छ । दैनिक हुने खेलको उत्कृष्ट खेलाडीले नगद ११ हजार रूपैयाँ र प्रतियोगिताभरको सर्वोकृष्ट खेलाडीले मोटरसाइकल पुरस्कार पाउने आयोजकले जनाएको छ ।
२०१८ सालबाट महेन्द्र गोल्डकपको नाममा आयोजना हुँदै आएको प्रतियोगिता २०६८ बाट विराट गोल्डकपमा रूपान्तरित भएको हो । प्रतियोगिताको आठौं संस्करण सञ्चालनका लागि १ करोड १८ लाख ४३ हजार २ सय रूपैयाँ खर्च लाग्ने अनुमान गरिएको छ ।
Post Views: 0