विराटनगर । इटहरीमा जारी १४ औँ संस्करणको अन्तर्राष्ट्रिय आमन्त्रण कन्ट्रोल इटहरी गोल्डकपको उपाधिका लागि चर्च ब्वाइज युनाइटेड र नेपाली सेनाको विभागीय टोली त्रिभुवन आर्मी क्लबबीच प्रतिस्पर्धा हुने भएको छ ।

इटहरी रङ्गशालामा बिहीबार राति भएको सेमिफाइनलमा आयोजक राष्ट्रिय जागृति क्लबलाई १-० गोल अन्तरले पराजित गर्दै चर्च ब्वाइजले उपाधिका निम्ति आर्मीसँगको भिडन्त पक्का गरेको हो । चर्च ब्वाइज झापा गोल्डकप विजेता टोली हो । यो टोली इटहरी गोल्डकपको अघिल्लो संस्करणको उपविजेता हो ।

चर्च ब्वाइजका लागि समीर तामाङले खेलको अन्तिम समयमा गरेको गोल नै निर्णायक बन्यो । उनले खेलको ८९ औँ मिनेटमा निर्णायक गोल गरेका थिए । उनी खेलको म्यान अफ द म्याच घोषित हुँदै नगद १० हजार हात पारेका छन् । उपाधिका निम्ति भोलि चर्च ब्वाइज र आर्मीबीच प्रतिस्पर्धा हुनेछ ।

गत बुधबार राति त्रिभुवन आर्मी साविक विजेता मोरङको सगरमाथा क्लबलाई पेनाल्टी शुटआउटमा २–१ गोल अन्तरले हराउँदै फाइनलमा पुगेको हो । उपाधि विजेतालाई नगद १० लाख रूपैयाँ र उपविजेतालाई पाँच लाख रूपैयाँ प्रदान गरिने छ ।