विराटनगर । पूर्वराष्ट्रपति विद्यादेवी भण्डारीले विज्ञान र प्रविधिको क्षेत्रमा पहुँच पुर्याउने शिक्षाको आवश्यकतामा जोड दिएकी छन् । उनले अबको पुस्तका युवा देशको आर्थिक विकासमा लाग्नुपर्नेमा पनि जोड दिइन् ।
शुक्रबार विराटनगरमा आयोजित स्वतन्त्र विद्यार्थी युनियन (स्ववियु), महेन्द्र मोरङ आदर्श बहुमुखी क्याम्पसले आयोजना गरेको एक कार्यक्रमलाई सम्बोधन गर्दै उनले सो कुरामा जोड दिएकी हुन् ।
क्याम्पसका नवनिर्वाचित स्ववियु पदाधिकारीहरूलाई बधाई तथा शुभकामना दिँदै उनले नयाँ अध्ययन र अनुसन्धानमार्फत लोककल्याणको क्षेत्रमा नयाँ सिर्जना एवं अविष्कार गरी विश्वमा मुलुकको नामको कीर्तिमान राख्न विद्यार्थीहरूलाई अनुरोध गरिन् ।
उनले खाद्य सुरक्षा, जलवायु परिवर्तनको अनुकूलता र मुलुकको अर्थतन्त्र सबल बनाउने विषयमा विद्यार्थीहरूले विशेष ध्यान दिनुपर्नेमा जोड दिइन् ।
चिकित्सक, अर्थशास्त्री, उद्यमी, इन्जिनियर, नेता तथा समाजसुधारक उत्पादन गर्ने केन्द्र शिक्षालय भएकाले यसको विकासका लागि सहमतिका आधारमा संघीय सरकारले २० प्रतिशत बजेट विनियोजन गर्नुपर्ने पूर्वराष्ट्रपति भण्डारीले बताइन् ।
सोही अवसरमा पूर्वराष्ट्रपति भण्डारीले विभिन्न खेलकुद प्रतियोगिताका विजेतन, दोस्रो राष्ट्रिय डोरीतान प्रतियोगितामा स्वर्ण पदक विजेता मनिष खतिवडालाई प्रमाणपत्र वितरण गर्नुका साथै क्याम्पसका विद्यार्थीहरूलाई स्वास्थ्य उपचारमा विशेष छुट दिने सम्झौतापत्रमा हस्ताक्षर गर्ने विराटनगरका विभिन्न अस्पतालहरूलाई प्रमाणपत्र प्रदान गरेकी थिइन् ।
पुरस्कार वितरण, सम्मान, नयाँ विद्यार्थी स्वागत, झण्डोत्तोलन र स्वास्थ्य शिविरको उद्घाटन गर्दै उनले वर्तमान अवस्थामा स्वदेश तथा विदेशलाई आवश्यक पर्ने प्रतिस्पर्धी दक्ष जनशक्ति उत्पादनमा शिक्षालयले विशेष ध्यान पुर्याउनुपर्ने उनको सुझाव थियो ।
Post Views: 0