धरान, २१ चैत । पछिल्लो समय धरानलाई कर्मक्षेत्र बनाएर विभिन्न नाट्य समूहसँग आवद्ध भएर रङ्गमञ्चमा लागि लागिपरेका युवा रङ्गकर्मीहरूले सामूहिक नाटक गर्ने भएका छन् ।

युवा रङ्गकर्मीहरूको ह्वाइट हाउस इन्टरनेशनल कलेजको सेमिनार हलमा भएको परिचयात्मक चियापान कार्यक्रममा सो निर्णय भएको हो ।

कोभिड १९ को कारण सुनसान बनेको चलचित्र घर, नाटकघर चलायमान हुन थालेपछि धराने युवा रङ्गकर्मीहरू नाटकघरको अभावबीच सामूहिक नाटक गर्ने निर्णयमा पुगेकाे हो ।

उक्त कार्यक्रममा सामूहिक नाटकसँगसगै आगामी दिनमा एक अर्को नाट्य समूहबीच सहकार्य गरेर अगि बढ्ने भएको छ ।

धरानमा रहेको नाटकको पुरानो पुस्ता र नयाँ पुस्ताबीचको खाडल र नाट्य संस्थाहरूबीचको दूरी मेटाउनलाई सामूहिक नाटक गर्न लागेको रङ्गकर्मी मिलन चाम्लिङ राईले बताए ।

कोरोनाको कारण पछिल्लो समय सुस्ताएको धरानको रङ्गमञ्च पुनः चलायमान बनाउन नाट्य समूहगत नभइ सबै रङ्गकर्मी एकैठाँउ उभिएर नाटक गर्नुपर्ने महसुस भएको कारण सामूहिक नाटक गर्न लागेको अर्का रङ्गकर्मी हरि इवाहाङ लिम्बूले बताए ।

यसरी सबै नाट्य समूह मिलेर नाटक गर्दा धरानमा बसेर रङ्गकर्ममा लागिपरिरहेको युवाहरूले अपनत्व महसुस गर्ने पनि उनले बताए ।

पछिल्लो समय धरानमा धरान नाटकघर निर्माणाधीन अवस्थामा रहे पनि निर्माण सम्पन्न नभएसम्मको लागि वैकल्पिक नाटकघर आवश्यक रहेको महसुस भएको अर्का रङ्गकर्मी शान्तिराम राईले बताए ।

उक्त परिचयात्मक चियापान कार्यक्रममा पछिल्लो समय धरानमा क्रियाशील नाट्य समूह रङ्गभूमि एकेडेमी, आराम्भ नाट्य डबली , अनाम नाट्य समूह, साहारा थिएटरको पछिल्लो पुस्ताका युवा रङ्गकर्मीहरूको उपस्थिति रहेको थियो ।

सो कार्यक्रममा धरानको नाटकको इतिहासमाथि चर्चा गर्दै पछिल्लो समयको नाटकको माहोलसम्बन्धी छलफल भएको थियो ।