सुनसरी धरानका तिर्थराज विश्वकर्मा कविता लेखन क्षेत्रमा युवा कविका रुपमा उदाउदा छन् । महेन्द्र बहुमुखि क्याम्पस धरानमा अध्ययनरत विश्वकर्मा नाट्य क्षेत्रमा समेत आवद्ध रहेका छन् ।

विशेष गरि कविता लेखनमा रुचि राख्ने विश्वकर्मा कालकुट साहित्यिक मञ्च र युवा संजाल सकारात्मक परिवर्तनका लागि धरान नामक संस्थामा आवद्ध रहेका छन् ।

साहित्य क्षेत्रमा आवद्ध भएको छोटो समयमा आफ्ना शसक्त कविता मार्फत पाठकहरूको मन जित्न उनि सफल भएका छन् । विभिन्न कार्यक्रमहरूमा आफ्ना कविता प्रस्तुत गरिसकेका उनै विश्वकर्माका तीन कविता साताको साहित्यमा प्रस्तुत गरेका छौँ ।

……………….
जात थाहा छैन

छोरा त्यो रात
म अपवित्र भएको थिए
पवित्र घरमा छिर्न दिएनन् मलाई
पर……..गोठमा राखियो

अनि एकहुल मानिसहरु गोठमा आइपुगे
गनाउने शरीर र गनाउने मुख लिएर
मेरो शरीरसँग खेल्न थाले
मानौँ, मेरो शरीर कुनै पसलमा
राखिएको खेलौना हो

म रोएँ, चिच्याए, कराए
तर कसैले सुनेन्
त्यसपछि
मेरो आवाज मरिरह्यो
मेरो आशु झरिरह्यो
मेरो रगत बगिरह्यो

त्यसको फलस्वरूप तिमी
मेरो पेटमा फल्यौ र आज यहाँ छौ
तर साच्चै मलाई तिम्रो
जात थाहा छैन
…………………
म तिमिलाई प्रेम गर्छु

म तिमीलाई प्रेम गर्छु
भन्न मात्रै छोडेको हो मैले
तिमीलाई प्रेम गर्न छाडेको छुइन

विश्वास न लागे
यो भित्ताको कानहरुलाई सोध्नु
कसको नाम जपि
रहन्छ उसले भनेर

विश्वास न लागे
यो बाटोको छातीलाई सोध्नु
मेरो पाइतलाको डोब खोज्दै कहाँ सम्म पुग्छ उ भनेर

विश्वास न लागे
यो मेरो आखाहरुलाई सोध्नु
कसको यादमा आँशु त
झार्दै छस् भनेर

विश्वास न लागे
यो मेरो हातहरूलाई सोध्नु
कसको लागि यि प्रेमिल कविताहरू त लेख्दै छस् भनेर

विश्वास न लागे
यो मेरो मुटुलाई सोध्नु
किन र कसको लागि त
धड्कदै छस् भनेर

जुन दिन तिमीले मलाई छाडेर गयौ
त्यही दिन देखि हो तिमीलाई प्रेम गर्छु
भन्न छाडेको

तर
तिमीलाई प्रेम गर्न अझै
पनि छाडेको छुइन
यो कुरा तिमीलाई थाहा नहुन सक्छ
तिमी गए पछि झन धेरै तिमीलाई प्रेम गर्न थालेको छु
…………………
कमरेडलाई प्रश्न

कमरेड साँच्चै तपाईँले
धरहराको टुप्पोबाट के के देख्नुभयो ?
मलाई बताइ दिनुहोस्
म कविता लेख्न लागिरहेको छु !

भोकले बिहानै अस्ताएको
सुर्य बहादुरहरू देख्नुभयो ?

घामसँगै आफ्नो
पहिचान र अस्तित्व खोज्दै आएको बिकेनहरूलाई देख्नुभयो ?

एसिडले समाप्त पार्न खोजिएको सम्झनाहरूको सपनाहरू देख्नुभयो ?

तपाईंलाई यो पनि मन पर्न सक्छ
न्यायको लागि जोडजोडले
चिच्याउँदै गरेको निर्मलाहरूको आत्माहरू देख्नुभयो ?

जातकै कारणले मारिएर
फालिएका नवराजहरू देख्नुभयो ?

देशको ढुकुटीको पैसा
रक्सी र सुकुटीमा सक्ने
कमरेडहरू देख्नुभयो ?

गुलियो उखुहरू फलाउनेहरूको
आँखामा नुनिलो आँसुहरू देख्नुभयो ?

देश मुटु भित्र राखेर
मुटु देश भित्र राखेर
युवाहरू परदेश गएको देख्नुभयो ?

बेलाबेला देशको सिमानाको किल्ला
उताबाट यतायता सरेको देख्नुभयो ?

कमरेड साँच्चै तपाईँले
धरहराको टुप्पोबाट के के देख्नुभयो ?
मलाई बताइ दिनुहोस्
म कविता लेख्न लागिरहेको छु ।