विराटनगर । विराटनगर महानगरपालिकाका एक वृद्धले सापटी दिएको रकम फिर्ता नपाएपछि ऋणीको घरमा पुगेर आत्महत्या गरेका छन् ।
विराटनगर महानगरपालिका– ३ का ६५ वर्षीय गोबिन्दप्रसाद नेपालले ऋणीको घर अगाडी आँगनमा आफैलाई आगो लगाएर आत्महत्या गरेका हुन् ।
बृद्धले गत बैशाख १४ गते विराटनगर महानगरपालिका– ४ तित्रिगाछीका प्रगति भनिने गति पोखरेलको घर अगाडी आत्मदाह प्रयास गरेका थिए ।
२०७२ सालमा दिएको ऋण नउठेपछि बैशाख १४ गते बिहान करिब साढे १० बजे पोखरेलको घरमा पुगेर नेपालले आफैँलाई पेट्रोल छर्किएर आगो लगाएका थिए ।
आगोले जलेर गम्भीर घाइते भएका उनलाई रेडप्लस अस्पतालमा भर्ना गरिएको थियो । उपचारका क्रममा बैशाख १५ गते नेपालको मृत्यु भएको जिल्ला प्रहरी कार्यालय मोरङका डिएसपी रञ्जनकुमार दाहालले बताए ।
घटनापछि आत्महत्या दुरुत्साहन आरोपमा विराटनगर–४ तित्रिगाछीका प्रगति भनिने ५५ वर्षीय गति पोखरेल र उनकी बहिनी ३६ वर्षीय सबिना पोखरेललाई पक्राउ गरेको उनले बताए ।
उनका अनुसार नेपालले पोखरेललाई २०७२ सालमा २२ लाख रुपैयाँ ऋण दिएका थिए । ऋण उठाउन अनेक प्रयास गरे तर फिर्ता पाएनन् । ऋण उठाउने प्रयास असफल भएपछि ऋणीको घरमै पुगेर आत्मदाह गरेको अनुसन्धानका क्रममा खुलेको उनले बताए ।
मृतककी श्रीमतीले दिएको जाहेरीका आधारमा उनीहरूलाई आत्महत्या दुरुत्साहन आरोपमा बैशाख १८ गते पक्राउ गरिएको डीएसपी दाहालले बताए ।
पक्राउ परेकाहरूमाथि आत्महत्या दुरुत्साहन मुद्दामा पाँच दिन म्याद थप गरी अनुसन्धान भइरहेको उनको भनाइ छ ।
Post Views: 18