विनोद मेहता
विराटनगर, ३ जेठ । कोरोना महामारीको दोस्रो लहरपछि स्थानीय प्रशासनले जारी गरेको निषेधाज्ञामा पनि सुनसरीको देवानगञ्ज गाउँपालिकामा इन्धन तस्करी हुनेक्रम रोकिएको छैन । सोमबार बिहान देवानगञ्ज–२ मा एक तस्करले करिब २२० लिटर डिजेल भारततफै लैजाँदैगरेको पाइएको थियो ।

स्थानीयले उक्त तस्करलाई नियन्त्रणमा लिई कुटपिटसमेत गरेका थिए । तस्करीलाई स्थानीय दुई युवाले नियन्त्रणमा लिई कुटपिटसमेत गरेका हुन् । भारत आवत–जावत गर्दा कोरोनाको जोखिम बढ्ने भन्दा विवाद उत्पन्न भएपछि स्थानीयले कुटपिट गरेको वडा नं २ का वडासदस्य रमेन्द्रप्रसाद मेहताले जानकारी दिए ।

उनले भने, ‘बिहानै तेल भारततर्फ लैजाँदै गरेको भेटिएपछि स्थानीय युवाले कोरोनाको जोखिम बढ्ने कुरा सुझाउँदा विवाद भएको थियो । जसक्रममा दुई युवाले तस्करमाथि कुटपिटसमेत गरेका थिए । मैले समन्वय गरेर विवाद मिलाएँ र प्रहरीलाई सम्पर्क गरेँ ।’

स्रोतका अनुसार तेल तस्करीमा प्रहरीकै मिलोमतो हुन्छ । यस विषयमा स्थानीय सरकार मौन रहेकोमा स्थानीय दुखेसो गर्छन् । ‘हामी किराना समान लिन पसल जाँदा प्रहरीले जान दिँदैनन् । स्थानीय किसानको तरकारी खोसेर फाल्छन् र आफूलाई चाहिने लान्छन् पनि । निषेधाज्ञाको बेलामा यसलाई हामीले स्वीकार्नैपर्छ,’ स्थानीय गर्भु मेहता भन्छन्, ‘तर खुलेआम यसरी तस्करी हुँदा प्रहरी प्रशासन किन मौन छन् ?’

यसैगरी, अर्का स्थानीय रमेश मेहताले आफूहरूले बारम्बार सिडिओलाई यो विषयमा ध्यानाकर्षण गराएको भएपनि सुनुवाइ नहुँदा आफूहरू कुटपिटमा उत्रिनु परेको बताए । स्थानीयले बिहानै तस्करलाई नियन्त्रणमा राखेर प्रहरीसमक्ष बुझाएका थिए ।