काठमाडौं । प्राज्ञिक विद्यार्थी परिषद् नेपालले हिमाली जिल्लामा शैक्षिक सामग्री वितरण गर्ने जनाएको छ । शुक्रबार रिपोर्टर्स क्लवमा पत्रकार सम्मेलन मार्फत ११ वटा हिमाली जिल्लाहरूमा कक्षा ११ र १२ का विद्यार्थीहरूलाई शैक्षिक सामग्री वितरण गर्ने जानकारी दिएको हो ।

परिषद्ले सिन्धुपाल्चोक, दोलखा, रसुवा, बझाङ, ताप्लेजुङ, मनाङ, मुस्ताङ, गोरखा, मुगु, डोल्पा र हुम्लामा गरी ३२ लाख २७ हजार लागत मूल्य बराबरको सामग्री वितरण गर्ने जनाएको छ । जसमा व्याग, कपी, रेपिडेक्स पुस्तक, जमेक्ट्री बक्स, नेपाली बृहत शब्दकोश, टोपी लगायतका शैक्षिक सामग्रीहरू वितरण गरिने परिषद्का राष्ट्रिय महासचिव छितराज न्यौपाने जानकारी दिए ।

२०५२ सालमा स्थापना भएको परिषद्ले निरन्तर देशका ७७ वटै जिल्लाका शिक्षण संस्था, माध्यमिक तह (कक्षा ११ र १२) क्याम्पस तथा विश्वविद्यालयहरूमा विविध कार्यहरू गर्दै आएको न्यौपानेले बताए । विद्यार्थीहरूलाई सक्रियरूपमा राष्ट्र निर्माणको कार्यमा समाहित हुन परिषद्ले प्रेरणा प्रदान गर्दै आइरहेको उनको भनाई छ ।

सोही सेवा कार्यलाई प्रथमिकता दिदै परिषद्ले हिमाली भेगमा अध्ययनरत विद्यार्थीहरूको आवश्यकतालाई महसुस गरी ११ वटा जिल्लाका कक्षा ११ र १२ मा अध्ययनरत १८ सय १० जना विद्यार्थीहरूलाई शैक्षिक सामाग्री वितरण गर्न गइरहेको उनले बताए ।

पत्रकार सम्मेलनमा विद्यार्थी परिषद्का राष्ट्रिय संगठन सचिवले विगत २७ बर्षदेखि निरन्तर सेवा कार्यहरू गर्दै आइरहेको र यसलाई निरन्तरता दिने क्रममा परिषद्ले भारतीय जनता र भारत सकारबाट प्राप्त भएको शैक्षिक सामाग्री विद्यार्थीहरूलाई वितरण गर्न लागिएको बताए ।

सम्मेलनमा विद्यार्थी परिषद्का राष्ट्रिय संगठन सचिव नारायण प्रसाद ढकाल, महासचिव छितराज न्यौपाने, राष्ट्रिय सचिव नारायण तिमल्सिना , राष्ट्रिय मिडिया प्रमुख कृष्ण हुमागाई ,महानगर सचिव जीवन जोसि लगायत विभिन्न संचार माध्यममा कार्यरत पत्रकारहरूको उपस्थितिमा विद्यार्थी परिषद्ले गर्ने कार्य र अभियानको विषयमा विशेष अन्तरक्रिया पनि भएको थियोे ।