इटहरी : इटहरीमा मादक पदार्थ सेवन गरेर धाकधम्की दिँदै हिड्ने कांग्रेसका वडा सभापतिलाई प्रहरीले पक्राउ गरेको छ । पक्राउ पर्नेमा नेपाली कांग्रेस इटहरी वडा नं. १० का वडासभापति प्रकाश कोइराला (खेमराज) रहेका छन् । भदौ १५ गते राति करीब साढे १० बजे स्थानीय सोनम अधिकारीको घरमा गएर अश्लील शब्द प्रयोग गर्दै धम्की दिएपछि प्रहरीमा उजुरी परेको थियो ।

“२५ गते रातिको समयमा रक्सी खाएर म डन हुँ, डीएसपी र मेयर मेरो मान्छे छन् भन्दै घरमै आएर धम्की दिएपछि हामीले प्रहरीमा उजुरी दिएका थियौँ,” सोनमका छोरा सन्जोक अधिकारीले भने, “रातको समयमा घरमै आएर आमामाथि अश्लील शब्द प्रयोग गर्ने र कुटपिट गर्न खोजेपछि प्रहरीमा उजुरी गरेका हौं, कति दिन सहने?”

असह्य भएपछि २६ गते बिहान इलाका प्रहरी कार्यालय इटहरीमा उजुरी गरेको उनले बताए । गत स्थानीय तहको निर्वाचनमा अधिकारी कांग्रेसबाट वडासदस्यमा उठेका थिए । सोही रिसिबी साँधेको हुनसक्ने उनको आशंका छ ।

“म गत स्थानीय निर्वाचनमा वडासदस्य उठेको थिएँ, वहाँ पार्टी सभापति भएकाले टिकट नपाएको रिस हुनसक्छ,” उनले भने, “वहाँले सबैलाई अन्डरमा राख्न खोज्ने र हामी पनि त्यही अन्डरमा बस्नुपर्छ भन्ने भएकाले धम्की दिएको हुनुपर्छ, यो असह्य हुन्छ ।”

प्रहरीमा उजुरी गरेपछि शनिबार कोइरालालाई पक्राउ गरिएको इलाका प्रहरी कार्यालय इटहरीका इन्सपेक्टर भीमबहादुर खड्काले बताए ।

“निवेदन दिएपछि पक्राउ परेका र पीडित पक्षलाई बोलाएर छलफल गराउने तयारी भइरहेको छ,” खड्काले भने, “छलफल गर्दा मुद्दा दर्ता गर्ने किसिमको घटना भएको पाइए कारबाहीको प्रक्रिया अगाडि बढाउँछौं ।”

उनले दुवै पक्षलाई छलफलका लागि बोलाइएको प्रतिक्रिया दिए ।