धरान, १ चैत । धरान उपमहानगरपालिका – १३ को अभिभावकत्वमा अन्तर्राष्ट्रिय धरान साहित्य तथा सांस्कृतिक महोत्सव २०७७ सम्पन्न भएको छ । देश तथा विदेशका एक सय ५० भन्दा बढी स्रष्टाहरू उपस्थित रहेको उक्त महोत्सव दुई दिनसम्म सञ्चालन भएको थियो ।

महोत्सवको पहिलो दिनमा ५० भन्दा बढी साहित्यकारहरूले आफ्ना कविता वाचन गरेका थिए । यस्तै पहिलो दिन नै नाट्यकर्मी गोपाल देवानको पुस्तक ‘दमनको राप’ को विमोचनसमेत गरिएको थियो । महोत्सवको दोस्रो दिन विभिन्न पर्यटकीय स्थलको भ्रमण, गजल वाचन र महोत्सवको समापन गरिएको थियो ।

धरान उपमहानगरपालिका – १३ का वडाअध्यक्ष नेत्र काफ्लेले साहित्य विकास नै मुख्य विकास भएको बताए । उनले भने, ‘विकास भनेको बाटो बनाउने, नाली बनाउने, घर बनाउने, ढल बनाउने मात्र नभएर साहित्य संस्कृति र बौद्धिक विकास गर्नु मुख्य विकास हो । यसको विकास गरे अन्य क्षेत्रको विकास स्वतः हुन्छ ।’ देशका विभिन्न ठाउँमा संञ्चालन भैरहने यस्ता कार्यक्रममा सबै क्षेत्रका साहित्यकार उपस्थित नभैरहेको अवस्थामा धरान महोत्सवमा देशैभरबाट साहित्यकारहरूको उपस्थित रहेको काफ्लेले बताए ।
यसैगरी नेपाल लोक वाद्यको संरक्षणमा योगदान पुर्याएका झापाको दमक निवासी मातृका संग्रौला र शिवसताक्षी ५ झापाकी भगवती ढुंगेललाई पनि साहित्यमा पुर्याएको योगदानको कदर गर्दै सम्मान गरिएको थियो ।

सम्मानितहरुलाई कार्यक्रमका प्रमुख अतिथी नेपाल प्रज्ञा प्रतिष्ठानका कुलपति गंगाप्रसाद उप्रेती, कार्यक्रम संयोजक बम देवान, १३ नं वडाका वडाअध्यक्ष नेत्र प्रसाद काफ्ले प्रा.डा. टंक प्रसाद न्यौपाने लगायतले सम्मानपत्र र नेपाली ढाका टोपी लगाएर सम्मान गरेका थिए ।